AI Academy

AI Academy tərəfindən Rəqəmsal İnkişaf və Nəqliyyat Nazirliyi və AZCON Holdingin tabeliyində olan qurumların İnsan resursları nümayəndələri ilə “AI Karyera Tərəfdaşlığı” görüşü keçirilib.

Görüşün məqsədi gənc süni intellekt mühəndislərinin əmək bazarına çıxışını dəstəkləmək, qurumların AI sahəsində istedad ehtiyaclarını daha yaxından anlamaq və karyera tərəfdaşlığı üzrə əməkdaşlıq imkanlarını müzakirə etmək olub.

Tədbir çərçivəsində MSİM komandasının süni intellekt üzrə məzmun yaradıcısı Mamed Qurbanov tərəfindən iştirakçılar üçün “Generative AI” mövzusunda praktiki təlim sessiyası keçirilib.

AI Academy olaraq istedad, işəgötürən və ekosistem arasında körpü rolunu gücləndirərək ölkədə süni intellekt sahəsində insan kapitalının inkişafına töhfə verməyə davam edirik.

AI Academy AZCON Holding tərəfindən Rəqəmsal İnkişaf və Nəqliyyat Nazirliyi və Elm və Təhsil Nazirliyi ilə əməkdaşlıq çərçivəsində təşkil olunan “Rəqəmsal körpü” Təcrübə Proqramının sertifikat təqdimetmə mərasimində təmsil olunub.

Proqramın birinci sessiyasını uğurla tamamlayan gənclərin mükafatlandırıldığı tədbirdə AI Academy-nin təhsil eksperti Şəhriyar Məmmədli çıxış edərək rəqəmsal gələcəyin formalaşmasında strateji təşəbbüslərin və gənc istedadların inkişafının önəmini vurğulayıb.

O, həmçinin öz peşəkar təcrübəsini iştirakçılarla bölüşərək sürətlə dəyişən texnologiya mühitində uğurlu karyera qurmaq, davamlı öyrənmək və rəqabətədavamlı mütəxəssis kimi formalaşmaq üçün vacib istiqamətlərə toxunub.

AI Academy olaraq gənclərin rəqəmsal bacarıqlarının inkişafını dəstəkləməyi missiyamızın mühüm hissəsi hesab edir, proqramın birinci mərhələsini uğurla başa vuran bütün iştirakçıları təbrik edir və onlara gələcək fəaliyyətlərində uğurlar arzulayırıq.

AI Academy tərəfindən tələbələrlə sənaye nümayəndələri arasında əlaqə yaratmaq, onları süni intellekt sahəsində real təcrübə və karyera perspektivləri ilə tanış etmək məqsədilə təşkil olunan “AI Coffee Talks” sessiyaları davam edir.

Sessiyanın növbəti görüşünün qonağı ölkənin aparıcı telekommunikasiya şirkəti Azercell-in İT departamentinin rəhbəri İlham Seyidnurov olub. Görüş zamanı süni intellektin müasir telekommunikasiya sektorunu necə transformasiya etdiyi, müştəri təcrübəsinin təkmilləşdirilməsində Sİ alətlərinin rolu və sənayenin gələcək trendləri ətrafında maraqlı müzakirələr aparılıb.

Sessiya tələbələrin böyük marağı və aktiv iştirakı ilə interaktiv diskussiya formatında keçib, gənclər karyera planları və telekom sektorunda Sİ tətbiqləri ilə bağlı suallarını birbaşa mütəxəssisə ünvanlamaq imkanı əldə ediblər.

AZCON Holding şirkətlərindən olan Milli Süni İntellekt Mərkəzi (MSİM) tərəfindən, Elektron Təhlükəsizlik Xidmətinin təşkilati dəstəyi ilə dövlət qurumlarının əməkdaşları üçün həyata keçirilən “Məhsul menecerləri üçün süni intellekt” təlim proqramı 1 may tarixində sertifikat təqdimetmə mərasimi ilə yekunlaşıb. Proqramda Xüsusi Rabitə və İnformasiya Təhlükəsizliyi Dövlət Xidməti (XRİTDX), İnformasiya Kommunikasiya Texnologiyaları Agentliyi və digər müvafiq dövlət qurumlarının əməkdaşları iştirak ediblər.

Təlimi uğurla başa vuran iştirakçılara sertifikatlar təqdim olunub. Mərasimdə XRİTDX-nin İdarə rəisinin müavini Vüqar Həsənov, XRİTDX-nin mətbuat katibi Saidə Bayramova və Elektron Təhlükəsizlik Xidmətinin Əməkdaşlıq və kommunikasiya sektorunun müdiri Həvva Hüseynli iştirak ediblər.

Təlim çərçivəsində iştirakçılar dövlət sektorunda məhsul yanaşması kontekstində süni intellektin tətbiqinə dair praktiki kompetensiyalar qazanaraq, məlumatların emalı, proseslərin avtomatlaşdırılması və AI əsaslı həllərin real iş mühitində tətbiqi üzrə bacarıqlarını inkişaf etdiriblər.

Bu təşəbbüs Azərbaycan Respublikasının 2025–2028-ci illər üçün Süni İntellekt Strategiyasında müəyyən edilmiş prioritetlərin icrası istiqamətində dövlət qurumlarında süni intellektin institusional tətbiqinə hazırlığın sistemli şəkildə gücləndirilməsinə xidmət edir.