Zomi Innkuan Adelaide

Zasakna:

Global Special Humanitarian Visa siauhna vai Kumpi lampan in online ah siauh ding vai kikheelna hong om ciang in, Malaysia leh India lampan in online ah siauh kipan pah in, tua online form siauhna pan in mipihte phutkhak ahih leh Language cihna mun ah Zomi cih omlo a, Zomi tang in Chin Zome leh Chin Tedim cih bek om hi ci in Zomi Refugee Committee ah President sem Sia Cin Piang leh Delhi ah Pastor khat in thu hong zasak ahihman in manlangtak in zum ah meeting na ah na puato pah thei ing.

Tua kikupna tungtawn in Department of Home Affairs ah laikhak in kigen a, laikhak kikhak zawh kalkhat leh ni 4 khit ciang Global Special Humanitarian Visa online form siauhna ah Language ah Zomi cih hong koihsak ta ung cih hong zasak uhi. Hih dan te pawl pen Federal issue ahihman in Federal MP te in constituent te buaina Parliament leh akisaipih Department te kiang ah advocate/thupuaksak leh genkhuan nei ahihman in, a manpha a i zatsiam leh ei a meet leh a zangmanpha suak ding hi hang cih hong phawkkik sak phapha ing.

Tua tawh kiton in tulaitak in a kidelh lai ahih leh Australian Standard Classification of Cultural and Ethnic Groups (ASCCEG) nuai ah code ki nei nailo suak ahihman in ImmiAccount sung ah ethnicity pen Zomi kigelh thei nailo phot hi. Hih pen tulaitak in zumlamte tawh kihona ka neih laitak leh mailam ah delh ding leh a hun a tun ciang a kisaipihte tawh kikup ding in na kithuza khin ing. Ethnicity ah Zomi hong om theihna ding zong I thungetna te ah phawk tek ding in hong ngen ing.

I biak Pasian in minthanna ngahta hen!

Lungdam,
Tg Go Suan Pau