Shkelzen Sinani

Shteti ynë po kalon një nga sprovat më të vështira të demokracisë sonë. Bllokada për zgjedhjen e Presidentit nuk është thjesht një ngërç, por një goditje ndaj dinjitetit institucional dhe një shpërfillje ndaj qytetarëve që kërkojnë stabilitet.

Aktorët politikë kanë për detyrë morale t'i shërbejnë shtetit, jo ambicieve të çastit. Megjithatë, ajo që po shohim është një paralizë që po gërryen themelet e shtëpisë sonë të përbashkët. Në këtë klimë, refuzimi i kandidaturës së Feride Rush*tit është jo vetëm i pakuptueshëm, por zhgënjyes. Si mund të mos vlerësohet një grua që i kushtoi jetën shërimit të plagëve më të rënda të këtij kombi? Znj. Rush*ti përfaqëson integritetin, sakrificën dhe atë autoritet moral që vendit i mungon aq shumë. Ajo do të ishte ura e nevojshme mes dhimbjes së viktimave dhe shpresës për një të ardhme dinjitoze.

Mekanizmi i konsensusit po shndërrohet në një “veto” shkatërruese. Ndërsa qeveria ndjek rrugën kushtetuese, qasja bllokuese e opozitës dëshmon një papjekuri të rrezikshme. Kjo nuk është më garë politike, por sakrifikim i së ardhmes për kalkulime të ngushta. Kushdo që zgjedh bllokadën, duhet ta dijë: historia nuk do t'i falë ata që rrënuan demokracinë për hir të inateve politike.

Është koha për kthim te arsyeja. Ne meritojmë një shtet që funksionon, jo një arenë ku interesi personal mbizotëron mbi atë kombëtar.