Atird Hoxha

Luftë klanesh në PS, qytetarët viktimë e arrogancës së Ramës në Vlorë

Vizita e sotme e Edi Ramës në Vlorë ishte një demonstrim i pastër i arrogancës së një njeriu që ka humbur kontaktin me realitetin dhe me qytetarët. Në vend që të takonte njerëzit, t’i dëgjonte, apo të përballej me shqetësimet e tyre, Rama u soll si pushtues në një qytet që nuk e ndien më si të vetin. Përzuri qytetarët që donin t’i afroheshin, i shpërfilli si të padukshëm dhe i trajtoi me përçmim. Rama bëri me qytetarët të kundërtën e asaj që u kërkon të bëjnë Dredha dhe njerëzit e tij në Bashkinë e Vlorës.Kjo nuk është sjellje e një Kryeministri, por e një sundimtari të trembur.

Ai nuk erdhi në Vlorë për të dhënë zgjidhje. Erdhi me dhëmbë të shtrënguar, me urrejtje në fytyrë dhe me tone kërcënuese ndaj kujtdo që nuk i bën temena.

Si në çdo regjim të konsumuar nga frika dhe kontrolli, edhe në Vlorë, Rama ka ngritur një pseudo komision, që sillet si pushtet paralel mbi Bashkinë e qytetit. Ky komision nuk është votuar nga askush, nuk ka asnjë atribut ligjor, nuk përfaqëson qytetarët, por vetëm interesat e një klani brenda Partisë Socialiste, që po përplaset për plaçkën. Është një grup i komanduar nga zyrat e Tiranës, i vendosur jo për të ndihmuar qytetin, por për të mbikëqyrur tenderat, emërimet dhe vendimet në shërbim të një pakice klienteliste. Ky është një sulm i drejtpërdrejtë ndaj autonomisë së pushtetit vendor, e garantuar nga Kushtetuta dhe ligji. Bashkia nuk është filial i qeverisë, dhe aq më pak është pronë e klaneve të brendshme të Rilindjes. Askush s’ka të drejtë të zëvendësojë institucionet vendore me grupe hijesh që nuk japin llogari para askujt. Edi Rama nuk kërkon partneritet institucional, ai kërkon nënshtrim total.

Bizneset që përballen çdo ditë me taksa të rritura, mungesë mbështetjeje dhe arbitraritet, sot morën vetëm ultimatume dhe frikësim.

Rama shau, qortoi, përzuri dhe kërcënoi. Ky është bilanci i një vizite “qeveritare” në një qytet ku prej vitesh Rilindja ka shkaktuar vetëm kaos, abuzim dhe zbrazje masive të rinisë.

Kjo sjellje e Ramës sot në Vlorë nuk është rastësi. Është filozofi qeverisëse e cila ka ne themel zhdukjen e dialogut, dhunë verbale ndaj çdo zëri ndryshe, dhe tentativë për të mbajtur nën presion çdo pushtet e individ që nuk i bindet.

Por Vlora nuk është nënshtruar dhe nuk do të nënshtrohet. Ky qytet ka dinjitet. Ka histori. Ka qytetarë që nuk e pranojnë të trajtohen si dekor në shfaqjet boshe të një Kryeministri që e ka harruar çfarë do të thotë të shërbesh.

Mund të përzësh qytetarët nga rruga, por nuk përzë dot të vërtetën. Mund të kërcënoje bizneset, por nuk mbulon dot dështimet. Mund të bërtasësh mbi zyrtarët, por nuk shpëton dot nga llogaridhënia. Ora e përballjes vjen. Dhe ajo nuk fal.

REPET E PRERA DHE PLANET PËR KULLA

Sot u prenë me “dëshirë”, një apo dy prej repave në perimetrin e stadiumit “Flamurtari”. Ndonëse gjethet ishin ende të gjelbra dhe hija e tyre prekte fushën e qytetit, u zhdukën pa shumë zhurmë. Por heshtja nuk e fsheh dot që ky është vetëm fillimi.

Një detaj domethënës për këto prerje ishte vizita e “Sulltan Ramës” në Vlorë.
Dhe nuk është rastësi që “Sinan Agai”, i njohur si një nga ata që e trumbeton më zellshëm “miqësinë” me Kryeministrin, është në qendër të kësaj lëvizjeje.

Bashkëpunimin e të njëjtëve emra do ta shihni në projektin për të ngritur kulla mbi hapësirën ku sot qëndron Pallati i Sportit, stadiumi “Flamurtari” dhe aneksi i tij i stërvitjes, një truall prej rreth 70.000 m², pronë publike dhe e qytetarëve të Vlorës.

Nga rrënjët e pemëve… drejt themeleve të betonit. Nga hija e jeshile… drejt hijes së korrupsionit.

Pemët e prerë sot janë vetëm paralajmërimi i një skenari më të errët.