Animal Rescue Albania

E njëjta betejë🍀🐾🌎

E nisën me qentë e rrugës.

I tërhoqën zvarrë. I helmuan. I hodhën në kosha plehrash sikur të ishin mbeturina.

Dhe shumica heshti.

Sepse menduan se ishte thjesht një “çështje qensh”.

Por problemi nuk kanë qenë kurrë qentë.

Problemi është një sistem i udhëhequr nga lakmia, ku fasada sh*tet si progres dhe dritëshkurtësia paraqitet si vizion.

I njëjti mentalitet që justifikon mizorinë ndaj një kafshe, justifikon edhe shkatërrimin e një parku.

I njëjti mentalitet që mbyll sytë para dhimbjes së një kafshe, mbyll sytë edhe para padrejtësisë ndaj një qytetari.

I njëjti mentalitet që sheh një jetë si mbeturinë, sheh edhe natyrën si pronë për t’u shfrytëzuar, lumenjtë për t’u betonizuar dhe zonat e mbrojtura për t’u sakrifikuar.

Dhimbja në rrugët tona, helmet, qeset e zeza, qytetarët e tërhequr zvarrë dhe buldozerët në Porto Nartë janë pjesë e të njëjtit helm: një sistem që nuk njeh ligj, kufij apo empati.

Për ne kjo nuk është çështje politike.

Është një kauzë që mbron jetën, në çdo formë të saj.

Për vite me radhë kemi protestuar, shpesh me kosto personale.

Kemi refuzuar të heshtim kur të tjerët kanë zgjedhur të mbyllin sytë.

Sepse dështimi, paaftësia dhe indiferenca nuk kanë vrarë vetëm jetë kafshësh, por kanë lënë mbi supet tona e qindra vullnetarëve një barrë që duhej ta mbante shteti.

Prandaj kjo protestë është edhe e jona.

Nuk janë beteja të ndryshme.

Është e njëjta betejë.

Për ata që nuk pranojnë arbitraritetin.
Për ata që refuzojnë të heshtin.
Për ata që besojnë se jeta, dinjiteti dhe e drejta duhet të mbrohen për çdo qenie të pambrojtur.

Sepse beteja jonë është për kufirin që vendosim si shoqëri mes qytetërimit dhe barbarisë.

🚨 NJOFTIM I RËNDËSISHËM 🚨

Kohët e fundit është vënë re se në disa zona të Tiranës, por edhe në periferi, janë lëshuar qen nga strehëza e Bashkisë Tiranë

Ky proces po zhvillohet shkel e shko, pa respektuar standardet bazë të menaxhimit të qenve të rrugës.

Qentë nuk po rikthehen në habitatin nga i cili janë marrë. Për më tepër, shumë prej tyre mund të kenë kohe te gjatë në strehë dhe do ta kenë jashtëzakonisht të vështirë të përshtaten me një mjedis krejtësisht të ri.

💔Megjithatë, e vërteta e hidhur është se ne ndihemi më të qetë kur i shohim në rrugë, edhe pse të ekspozuar ndaj rreziqeve, sesa të mbyllur në një strehë pa standarde kujdesi, ku kalojnë jetën në kafaz pa dalë asnjëherë jashtë.

Sot kemi një thirrje për të gjithë ju.

Nëse shikoni qen me pulla identifikuese, zakonisht të rrumbullakëta, kini parasysh se mund të jenë qen të sapolëshuar nga strehëza e Bashkisë.

⚠️ Ju lutemi tregoni kujdes.

🐾 Mbajini nën vëzhgim.
🐾 Sigurojuni ushqim dhe ujë kur është e mundur.
🐾 Nëse janë në gjendje të mirë shëndetësore, përpiquni të organizoni vaksinimin e tyre.

Në përpjekje për të përballuar këtë situatë, Vet Hospital na ka ofruar mundësinë e vaksinimit me çmime të reduktuara, në nivel kostoje, si dhe, kur të jetë e mundur, dërgimin e veterinerëve në terren për të ndihmuar me vaksinimin e qenve në zonat ku ndodhen.

Këta qen kanë nevojë për vëmendjen dhe mbështetjen e komunitetit.

💔 Ju lutemi Mos u bëni keq. Këta qen duan vetëm të jetojnë. Shumë prej tyre kanë kaluar tashmë ferrin e braktisjes dhe izolimit. Jepuni ujë, pak ushqim dhe tolerojini. Mirësia juaj mund të jetë ndryshimi mes jetës dhe vdekjes🐾