GuideKS

Qyteti pa muze!

I njohur si qytet me histori, kulturë, traditë tregtare, zejtari, mikpritje dhe humor,

Gjakovë mbetet një nga qytetet më të rëndësishme historike dhe kulturore në Kosovë. Ajo ka qenë ndër vite një qendër e gjallë e jetës qytetare. Çarshia e Madhe është simbol i identitetit të saj, një hapësirë që përfaqëson shpirtin dhe kujtesën kolektive të këtij qyteti.
Përveç trashëgimisë kulturore dhe shpirtit artistik, qyteti mban edhe plagë të thella nga lufta e fundit. Gjatë viteve 1998–1999 përjetoi humbje të mëdha njerëzore dhe materiale. Shumë familje ende sot kërkojnë drejtësi për fatin e më të dashurve të tyre.
Ka kaq shumë histori dhe sakrificë. Ndërtimi i një muzeu që do të dokumentonte ngjarjet, masakrat, vrasjet, luftën dhe rezistencën, së bashku me dëshmitë dhe kujtimet e asaj periudhe, nuk do të ishte krim, por detyrim moral.

Shembulli më i fortë i kujtesës së gjallë është muzeu i ngritur nga znj.Ferdonije Qerkezi ose nana Ferdonije ose nana e të gjithe djemeve të qytetit.
Ai nuk ishte detyrim institucional, por vullneti i një gruaje të hekurt, e cila dhimbjen e shëndërroi në forcë dhe shtëpinë e saj në muze për të treguar krimet barbare të forcave serbe dhe për të ruajtur kujtimin e familjes së saj.

Një muze i luftës do të ishte jo vetëm vend përkujtimi për viktimat, por edhe hapësirë edukimi për brezat e rinj, që të mësojnë për të kaluarën dhe të kuptojnë vlerën e paqes.
Liria kurrë s’ka qenë e mirëqenë dhe kurrë nuk do të jetë.
Ky qytet meriton një hapësirë dinjitoze ku historia e dhimbshme të ruhet dhe të tregohet me respekt. Kujtesa është përgjegjësi, dhe ruajtja e saj është obligim.
Qyteti i historisë, kulturës dhe qëndresës nga Çarshia e Madhe e deri te çdo rrugë që mban kujtime.Po po ky qyteti pa Muze!

Muzeu i luftës nuk është vetëm ndërtesë.
Është kujtesë.
Është respekt për viktimat.
Është mësim për brezat që vijnë.
Që sakrifica të mos harrohet kurrë dhe që historia të mos përsëritet më.
Rudina Efendiu Lila