Pravasi Risala

മിഡില്‍ ഈസ്റ്റിലെയും ആഗോളതലത്തിലെയും നിലവിലെ അശാന്തി ഗള്‍ഫ് പ്രവാസികളുടെ നിത്യജീവിതത്തെയും സ്വപ്നങ്ങളെയും കീറിമുറിച്ച നേരനുഭവങ്ങൾ നടുക്കുന്നതാണ്. വലിയ രാഷ്ട്രീയവിശകലനങ്ങളും സാമ്പത്തിക സൂചികകളും എപ്പോഴും യുദ്ധത്തെ അളക്കുന്നത് കോടികളുടെ നഷ്ടക്കണക്കുകളിലാണ്. വിമാനങ്ങള്‍ എവിടെയോ ബോംബുകള്‍ വര്‍ഷിക്കുന്നു, മിസൈലുകള്‍ എവിടെയോ തീയുണ്ടകള്‍ പായിക്കുന്നു. എന്നാല്‍ ആ യുദ്ധമുനമ്പുകളില്‍ നിന്ന് അയ്യായിരവും പതിനായിരവും കിലോമീറ്ററുകള്‍ അകലെ, ഗള്‍ഫിലെ കണ്ണഞ്ചിപ്പിക്കുന്ന പ്രകാശഗോപുരങ്ങള്‍ക്ക് താഴെ ഇനിയെന്ത് എന്നറിയാതെ പകച്ചുനില്‍ക്കുന്ന ഒരു വലിയ മനുഷ്യസമൂഹമുണ്ട്. അവരുടെ അടുക്കളകളിലാണ് യുദ്ധത്തിന്റെ ആദ്യത്തെ വെടിയുണ്ട പതിക്കുന്നത്. അവരുടെ നെഞ്ചകങ്ങളിലാണ് അതിന്റെ പുകച്ചില്‍ പടരുന്നത്.