Gulf News Update

برطانیہ کی عدالت نے سعودی طالب علم محمد القاسم کے ق ت ل میں ملوث 22 سالہ برطانوی شہری چاس کوریگن کو عمر قید کی سزا سنا دی ہے۔ عدالتی فیصلے کے مطابق ملزم کم از کم 22 سال 6 ماہ جیل میں گزارنے کے بعد ہی پیرول کیلئے درخواست دینے کا اہل ہوگا۔

عدالت میں بتایا گیا کہ 20 سالہ محمد القاسم گزشتہ سال انگلینڈ کے شہر کیمبرج میں انگریزی زبان کی تعلیم حاصل کرنے آئے تھے۔ یکم اگست 2025 کو وہ اپنی رہائش گاہ کے قریب دوستوں کے ساتھ موجود تھے جب ملزم نے بلااشتعال حملہ کرتے ہوئے ان کے گلے پر چاقو سے وار کیا، جس کے نتیجے میں وہ موقع پر ہی جاں بحق ہو گئے۔

استغاثہ کے مطابق حملے کے وقت ملزم شراب اور منشیات کے اثر میں تھا جبکہ مقتول اور ملزم پہلے کبھی ایک دوسرے سے نہیں ملے تھے۔ مختصر غور و خوض کے بعد جیوری نے ملزم کو ق ت ل کا مجرم قرار دیا۔

محمد القاسم کے اہلِ خانہ نے انہیں ایک محنتی، بااخلاق اور اپنے خاندان کا سہارا قرار دیتے ہوئے کہا کہ وہ صرف تعلیم کے مقصد سے برطانیہ آئے تھے، لیکن ان کی زندگی ایک بے وجہ تشدد کا نشانہ بن گئی۔

امریکا کے شہر نیو یارک میں مقیم 53 سالہ پاکستانی اشتیاق حسین کی المناک موت نے ہر سننے والے کو غمزدہ کر دیا ہے۔ وہ ایک دہائی سے زائد عرصے تک اوبر ڈرائیور کے طور پر محنت کرتے رہے تاکہ پاکستان میں موجود اپنی اہلیہ اور چار بچوں کیلئے بہتر مستقبل بنا سکیں۔ برسوں کی جدوجہد کے بعد وہ اپنے خاندان کو امریکا بلانے اور نئی زندگی شروع کرنے کی تیاری کر رہے تھے، تاہم بروکلین میں ایک عمارت میں لگنے والی آگ کے دوران ریسکیو آپریشن میں پیش آنے والے حادثے کے باعث ان کی زندگی کا سفر ختم ہو گیا۔ یوں ایک باپ کا برسوں پرانا خواب پورا ہونے سے پہلے ہی بکھر گیا اور اہلِ خانہ خوشیوں کے بجائے گہرے صدمے سے دوچار ہو گئے۔