Haklaken.com

To'o Agora, COVID 19 Afeta Ona Timoroan 22.822, 130 Mate

Segunda (28 Marsu 2022), Haklaken_Bazeia ba dokumentus ne'ebé www.haklaken.com asesu iha pájina ofisiál Ministériu Saúde (MS) katak, husi Marsu 2020 to'o ohin Marsu 2022, Timoroan na'in rihun 22.822 mak hetan afetadu husi COVID 19.

Iha komunikadu imprensa ne'ebé deklara husi Diretora Jerál Prestasaun Saúde (DJ-PS), Odete da Silva Viegas katak, Timoroan na'in 130 mak mate ona ho COVID.

"Kazu detetadu foun ida, kazu rekuperadu foun ida no kazu ne'ebé sei ativu iha izolamentu hamutuk 13, entretantu total kazu husi 2020 to'o marsu 2022 hamutuk rihun 22.822 no ema ne'ebé mate ona ho COVID 19 hamutuk 130," Koordenadora Jerál Surtu COVID 19 ne'e alerta ba públiku liuhusi komunikadu imprensa.

Koordenadór ne'e akresenta, munisípiu sanulu laiha kazu ativu, maibé kapitál Díli ho RAEOA sei iha kazu esporádiku.

Diretora ne'e mós salienta, fatin izolamentu sira hanesan Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu sira.

Tanba ne'e, ba sidadaun ne'ebé husi estranjeiru mak tama iha Timor-Leste ho vasina dala rua ona hein depois oras 48 teste PCR negativu foin bele la'o livre iha teritóriu nasionál. Maibé sidadaun hirak ne'ebé vasina dala 1 nomós sedauk vasina sei halo karantina durante loron 14 hafoin teste PCR negativu mak foin livre.

"Ema ne'ebé mai husi estranjeiru tantu via Aereu, Terestre no Marítima sei halo teste imediata iha pontu entrada hafoin oras 24 ba oras 48 ho rezultadu teste PCR negativu maka bele la'o livre," katak Odete.

Entretantu kona-ba sidadaun ne'ebé kompleta ona vasina iha Timor-Leste tomak foin atinje 72,7%. Tanba ne'e husu ba sidadaun ne'ebé foin vasina dala ida ka seidauk simu vasina kontra COVID 19, hakbesik aan ba sentru vasinasaun atu hetan vasina. #