Wasaib Times Pakistan

انشاء اللہ 22اپریل 2026بروز بدھ ۔

سرائیکی آزاد نظم
"محبت جیہڑی کہاݨی ہے"
شاعر۔محمد صابرعطاء

کَل سانول مِلیَئے چوک دے وِچ
میں آکَھئے اے کوئی رِیت تاں نہیں
تُساں ہَفتہ ہَفتہ مِلدے نَئیں
میڈا سانول اے کوئی پَرِیت تاں نَئیں۔؟

سوہنڑےسانول ٹَھڈڑاساہ بَھریَئے۔

سَجے مُونڈھے سِرکُوں سَٹیاہِس
میڈے مُونڈھے تے ہَتھ رکھیا ہِس
وَت اَکھیاں دے وِچ اَکھیاں پاء کے
تھوڑا تھوڑا مُسکراء کے

ہولے ہولے آہدَۓ میکوں۔
صابِر ہالے اِی بھولا ہیں تُوں
کَہڑے دوراِچ رِیتاں لَبھدَئیں؟
کھوٹ اِچ سَچیاں نِیتاں لَبھدَئیں؟
دل وِچ پاک مَسیتاں لَبھدَئیں؟

صابِرعطاءتیکوں کِیاآکھاں میں۔۔۔
مُحبت جہڑی کہانڑی ہے
اوتاں گل پُرانڑی ہے۔

سرائیکی مجموعہ کلام"جوگی پہلے منتر سمجھے"میں سے ایک نظم
سال 2011