ACT NCR UNION Pasig Chapter

Dapat pinopondohan ng gobyerno ang mga subsidiya gamit ang appropriations o tax mechanisms at hindi direktang ipinapasa sa mga konsyumer, giit ni Bayan Muna chair Neri Colmenares. | via TV Patrol

Iba pang detalye sa comment section.

Nakikiisa ang Alliance of Concerned Teachers (ACT) Private Schools sa matinding pagdadalamhati ng pamilya at komunidad ng 19 na nasawi sa naganap na masaker sa Toboso, Negros Occidental.

Mariin naming kinokondena ang 79th at 303rd Infantry Brigade ng AFP, sa inilunsad nitong masaker laban sa 19 na indibidwal at pagpapalayas sa mga komunidad sa Toboso.

Batay sa iba’t ibang ulat mula sa mga lokal na organisasyon, human rights groups, at maging ng media, 9 sa pinaslang ay sibilyan. Dahil rito magsasagawa ang Commission on Human Rights ng independent investigation.

Hindi hiwalay ang insidenteng ito sa mas malawak na kasaysayan ng Negros Occidental—isang probinsyang matagal nang binabalot ng malawakang kahirapan, kawalan ng lupa ng mga magsasaka, at militarisasyon sa kanayunan. Sa kabila ng pagiging sentro ng produksyon ng asukal, nananatiling api at naghihirap ang maraming manggagawang bukid at magsasaka. Mapait ang asukal na inaani sa Negros dahil sa mga dugong dumanak sa lupain nito.

Sa mga nagdaang taon, sunod-sunod ang mga naitalang karahasan sa isla, kabilang ang mga masaker at operasyong militar na nagdulot ng takot at paglikas sa mga komunidad. Ipinapakita nito na nananatiling buhay ang mga ugat ng armadong tunggalian sa rehiyon.

Kasabay ng karahasan sa lupa ay ang pag-igting ng disimpormasyon. Ang pagpapakalat ng mga fake news at malisyosong mga pahayag sa social media ng mga trolls sa pangunguna ng NTF-ELCAC.

Ang diumano’y pagpapatupad ng media blackout at kontrol sa impormasyon ay lalo lamang nagpapalabo sa katotohanan at nagpapahirap sa paghahanap ng hustisya.

Naninindigan ang ACT Private Schools na dapat papanagutin ang mga may sala at igalang ang karapatang pantao at International Humanitarian Law. Sinusuportahan namin ang panawagan para sa isang independiyente, malaya, at masusing imbestigasyon sa pamamaslang sa Toboso.

Malinaw na hangga’t hindi natutugunan ang ugat ng armadong tunggalian—ang malawakang kahirapan, kawalan ng lupa, at sistematikong inhustisya—mananatili at mananatili ang paglaban ng mamamayan.

Sa lansangan man o sa kanayunan, patuloy na igigiit ng sambayanan ang kanilang karapatan sa buhay at kabuhayan.

Hustisya para sa Negros 19!
#