ABS FM Radio Mati

MALINAWON NGA PAGPADAYAG SA MACAMBOL: KONTRA SA PAGPABAG-O UG PERMIT SA MINAHAN

Nagsugod karong adlawa, Hulyo 21, 2026, ang malinawong protesta sa Sitio Casanihan, Barangay Macambol, Dakbayan sa Mati. Naghiusa dinhi ang mga tag-iya sa pribadong yuta, mga Lumad o Indigenous Peoples (IP), relihiyosong grupo, mangingisda, mag-uuma, mga opisyales sa purok, media, ug uban pang sektor aron ipahayag ang ilang pagdumili sa gipangayo nga pagpabag-o sa operasyon sa Hallmark Mining Corporation sulod sa ilang ancestral domain.

Gihimo kini human sa balita nga nag-aplay ang kompanya nga palugdan pa ang ilang pagmina sulod sa dugang 25 ka tuig. Gipasabot sa mga nag-organisa nga nagpadayon pa ang proseso sa Free, Prior and Informed Consent (FPIC)—ug katungod sa mga apektadong Lumad ang pagdesisyon kung motugot ba sila o dili.

Sa pagkakaron, mokabat sa 50 ka tawo ang mitambong, apan gipaabot nga modaghan pa kini samtang nagpadayon ang adlaw. Nagdala sila og mga tarpaulin ug karatula nga nag-ingong "No to Mining".

Gipasiugda nila ang pagpanalipod sa kinaiyahan—ilabi na nga ang lugar duol sa Mount Hamiguitan Range Wildlife Sanctuary nga usa ka UNESCO World Heritage Site, ug sa Pujada Bay, usa sa labing bililhon nga dagat sa atong nasud. Gusto nila kini tipigan para sa umaabot nga henerasyon.

Ang mga awtoridad nagbantay sa sitwasyon aron masiguro nga magpabiling malinawon ug hapsay ang kalihokan, ug matahod ang katungod sa tanang bahin.

MAYOR ALMARIO: PAG-ALAGAD SA HAYOP UG PUGNGAN ANG PAGLATAGAW SA DALAN!

Daghan na ang nakadawat og reklamo gikan sa mga motorista nga hapit na madisgrasya tungod sa mga hayop nga naglatagaw sa mga kalsada sa Mati—lakip na ang mga iro, iring, ug baka.

Tungod niini, gimando ni Mayor Joel Mayo Almario ang Office of the City Veterinarian nga seryosohon ang pagkulong sa mga iro nga naghikaplag sa mga dalan.

"Please mahala ninyo inyong mga iro, iring, baka, ug uban pang hayop. Kinabuhi usab sila. Ayaw sila pabyae maglatagaw sa kadalanan—makapaak, makadala og disgrasya, makasamok, ug makahugaw sa atong lugar," pasabot ni Mayor Almario.

Dugang pa niya: "Kung naa moy makita nga baka sa dalan nga gipasagdan sa tag-iya, inyoha na. Ako na ang makig-atubang sa tag-iya."

Gihimo kini aron mapanalipdan ang kaluwasan sa mga motorista, lumulupyo, ug mga turista nga mobisita sa atong dakbayan. Magtinabangay ta para sa limpyo ug luwas nga Mati!

📸 City of Mati

DAVAO ORIENTAL GOV. DAYANGHIRANG, GIILA ISIP USA SA TOP-PERFORMING GOVERNORS SA PILIPINAS

Dako nga garbo sa atong probinsya! Ang Davao Oriental Governor Nelson “Boy” Dayanghirang nalakip sa nasudnong listahan sa mga labing kasaligan ug maayo modagan sa katungdanan nga gobernador, sumala sa independenteng survey nga gipagawas sa(RPMD) Foundation Inc.

Gipasukad kini sa ilang “Boses ng Bayan” Index of Governance (IOG) usa ka sukdanan nga naghiusa sa rating sa pagsalig sa katawhan ug tinuod nga paghatag og serbisyo.

Resulta para kang Gov. Dayanghirang:
- Kinatibuk-ang IOG Score: 81.81%
​- Pagsalig sa katawhan: 81.55%
​- Pagtuman sa katungdanan: 82.08%

Nahimutang siya sa mga grupo sa mga top governors sa tibuok nasud. Ang survey gihimo kaniadtong Abril 2026, nga adunay 5,000 ka random nga gisurbi matag rehiyon, ±1% margin of error ug 95% confidence level

Sakop sa gisusi ang pagpangulo, pagdumala sa pondo, serbisyong sosyal, kaluwasan, imprastraktura, pag-andam sa kalamidad, ug pagtubag sa gipangayo sa katawhan.

Kini nga pag-ila garbo sa tibuok Davao Oriental! Padayon ta sa pagtinabangay para sa mas maayong serbisyo ug pag-uswag sa atong probinsya.

KAMPYON SA KALIBUTAN: ESPANYA!

Dako nga kalipay sa tibuok nasud sa Espanya human sila gikoronahan isip bag-ong Kampeon sa FIFA World Cup 2026!

Sa tinuod lang, dili sayon ang ilang giagian gikapus sila pag-ayo sa kontra sa tensyonadong dula sa final. Pero tungod sa ilang kaisog ug wala nagpapadaog-daog, nakuha nila ang labing dako nga premyo sa kalibutan sa FIFA.

Makita sa mga litrato nga nag ginaksanay ug nagsayaw ang mga magdudula sa sentro sa dulaanan isip pagpasalamat. Kini usa ka makasaysayanong kadaugan ang unang World Cup nga tropeyo alang niining bag-ong henerasyon sa mga stars sa La Roja!

📸Fifa world Cup

via; Glenn Lazaro Ybañez

HVI UG KAUBAN, NAHULOG SA OPERATION SA MATI

Giila nga High Value Individual ug iyang kauban ang nadakpan sa buy-bust operation sa Barangay Matiao, Mati City kagabii.

Nakuha gikan kanila ang tulo ka gramo nga gidudahang shabu nga mokabat sa 20 mil pesos, lakip ang sakyanan ug uban pang ebidensya. Ang operasyon gihimo sa atong kapulisan kauban ang PDEA ug mga ahensya sa probinsya.

Ang mga nadakpan karon nag-atubang na sa saktong kaso. Padayon ang atong mga pulis sa paglimpyo sa atong syudad kontra droga.

Kung naa kay nahibaw-an nga kalihokan, ayaw pagduha-duha pagtawag o pagpadala og impormasyon sa kapulisan.

Magtinabangay ta para sa luwas nga Mati!

📸Mati Pcr

via; Glenn Lazaro Ybañez
Reporter

GIBANTAYAN ANG POSIBLENG BAGYO NGA MUSULODAY SA PINAS

Adunay gitan-aw nga posibleng mahimong bagyo nga mosulod o maporma duol sa atong nasud karong semanaha. Kung maaprubahan na, 'Kiyapo' ang iyang ngalan.

Wala pa sigurado kung asa kini padulong pwede mopaduol sa Luzon, pwede usab moliko palayo. Pero sigurado, magdala kini og Habagat nga magpaulan sa daghang lugar, ilabi na sa kasadpan.

Busa ayaw pagkumpyansa, amigo. Padayon sa pagbantay sa balita, ilabi na kanatong mga naa sa dapit nga daling ma-landslide o baha. Mag-andam sa kanunay mga ka-Abs !

via; Glenn Lazaro Ybañez

𝐓𝐑𝐀𝐕𝐄𝐋 𝐀𝐃𝐕𝐈𝐒𝐎𝐑𝐘: One lane passable na sa tanang matang sa sakyanan ang dalan sa Sitio 𝐂𝐨𝐥𝐢𝐥𝐢𝐬𝐢, 𝐁𝐫𝐠𝐲. 𝐓𝐚𝐠𝐚𝐛𝐚𝐤𝐢𝐝, 𝐂𝐢𝐭𝐲 𝐨𝐟 𝐌𝐚𝐭𝐢, 𝐃𝐚𝐯𝐚𝐨 𝐎𝐫𝐢𝐞𝐧𝐭𝐚𝐥, sa Pres. Diosdado Macapagal National Highway.

Ginapahimangnoan ang tanang motorista ug biyahero nga magpadayon sa pag-amping sa pag-agi sa maong lugar ug padayon nga i-monitor ang mga official advisories alang sa mga pinakabag-ong updates.