FEU Advocate

: Sa unang pagwagayway ng watawat pagkatapos ng digmaan sa Alapan noong taong 1898, nasaksihan ang bakas ng matapang at malawakang paninindigan ng sambayanang Pilipino laban sa katiwaliang nagkait ng isang mapagpalayang kinabukasan.

Bagama’t pansamantalang nahinto ang himagsikan dahil sa Kasunduan sa Biak-na-Bato na nagpatalsik sa mga lider ng rebolusyon, hindi tumigil ang puwersa ng mga Pilipino sa patuloy na paghamon sa katiwaliang namamayani sa sariling bayan. Sa pagbabalik ni Emilio Aguinaldo, mas lalong sumiklab ang patriyotismo sa bawat isa, na naging daan upang makamit ang kasarinlan ng Pilipinas.

Gayunpaman, hindi natapos sa Alapan ang mga hamong kinahaharap ng bansa; hanggang sa kasalukuyan, patuloy ang mga hakbang laban sa katiwalian. Katulad ng mga protestang naganap laban sa korapsiyon, pang-aabuso, paglabag sa hustisya, at pagyurak sa mga karapatan.

Patuloy mang sinisikap na patahimikin ang mga mamamayan, hindi ito naging hadlang sa kanilang patuloy na paghahangad ng kaayusan at pagbabago.

Sa paggunita ng ika-128 anibersaryo sa labanang nagpalaya ng bansa mula sa katiwalian, nawa’y bitbitin ng bawat Pilipino sa kasalukuyan ang aral ng pagtindig at pagboses para sa pagbabago.