Jeriel Asendiente

Ang Lungsod sa Tuburan gipaubos na usab karun sa State of Calamity gumikan sa grabeng epekto sa El Niño Phenomenon.

Niadtong petsa 15 sa Abril, 2024 mipalabang ug resolusyon ang Sangguniang Bayan pagdeklarar ug State of Calamity sa maong Lungsod gumikan sa halapad nga kadaot sa agrikultura, kakuwang sa tubig ug uban pang problemang dala sa maong huwaw.

Miabot sa 7,415,940 ang inisyal nga danyos sa agricultural crops 2,167,500 niini ang danyos sa 12.75 ektaryang produktong humay ug 5,247,990 usab ang danyos sa 169.29 ektaryang kamaisan.

Sigun sa Municipal Agriculture Officer sa maong Lungsod, Mr. Kent Marcial Catubis nga base palang kini sa inisyal nga datos sa produktong humay ug mais nga naapektohan sa huwaw, wala pay labot sa mga produktong utanon ug mga prutas diin padayon pa kini nilang gisubay karun.

Dugang niya nga ilang gipaningkamotan karun ang pagpalit ug mga materyales nga magamit pagpundo ug tubig sa mga mag-uuma, ingon man pagpamalit ug mga liso sa tanom nga makalahutay sa ting-init gamit ang calamity fund.

Base sa gisumiter nga datos sa Lokal nga Kagamhanan sa Tuburan pinaagi sa Municipal Disaster Risk Reduction Management Office (MDRRMO) ngadto sa Provincial Disaster Risk Reduction Management Office (PDRRMO) nga unom (6) ka mga dagkung tinubdan sa maong Lungsod ang nikunhod na karun ang supply sa tubig rason nga apektado sa pagkakarun ang 40 ka Barangay niini sud sa 54 ka Barangay sa Lungsod sa Tuburan.

Gani ang Tuburan Fire Station padayon usab nga nihimo karun ug pagpangrasyon ug tubig sa mga kabarangayan. Nakatala usab sila ug walo (8) ka mga kaso sa grassfire ug upat (4) ka mga kaso sa residential fire gumikan sa grabeng kainit.

Samtang si Engr. Jeric Talaid ang DRRM Officer sa maong Lungsod padayon nga mipahimangno sa katawhan sa Tuburan sa pag-amping kanunay panahon nga mogawas sa panimalay gumikan duna usab pipila ka mga health related cases nga natala.

High Value Individual nga Ex-convic nakuhaan ug 510,000 pesos nga kantidad sa gidudahang shabu.

Nasikop pinaagi sa Joint Buybust Operation sa PIU/PDEU Cebu Provincial Police Office ug Sogod Municipal Police Station ubos sa kamanduan ni CPPO Provincial Director PCOL PERCIVAL R ZORILLA, ganihang parado alas 2 sayo sa kadlawon, didto sa Barangay Mohon Sogod, Cebu.

Giila ang suspetsado nga si Ricardo Montebon Certifico 39 anyos ulitaw usa ka ex-convict ug residente sa nahisgutang lugar.

Nakuha gikan sa posisyon sa dinakpan ang napulo (10) ka medium size ug usa (1) ka large size transparent plastic sachet nga dunay sulod nga gidudahang shabu, usa ka genuine 500 peso bill ug 14,000 pesos nga buybust money.

Adunay gibug-aton nga 75 gramos ang illegal nga drugas ang nasakmit sa mga operatiba gikan sa dinakpan nga mokabat ug 510,000 pesos basi sa Standard Drug Price niini. Nakuha usab ang usa ka itom nga belt bag nga maoy gihimong sudlanan sa mga illegal nga drugas.

Daling giposasan ang suspetsado human nga gipahibaw kini sa iyang mga katungod isip dinakpan pinaagi sa Miranda Doctrine ug dali kining gidala sa Sogod Municipal Police Station detention cell alang sa pagpasaka sa kasong may kalambigatan sa R.A. 9165 o Comprehensive of Dangerous Drugs Act of 2002.