Knowledge Sharing

ဂေါ်ဖီထုပ် စားသင့်သောအကြောင်းအရင်းများ

==================

သာမန်အားဖြင့် ဂေါ်ဖီထုပ်ကို အသုပ်တွေထဲမှာသာ ထည့်စားလေ့ရှိပြီး နှစ်နှစ်ခြိုက်ခြိုက်ချက်စားတာမျိုးက ရှားပါတယ်။ ဒါပေမယ့် သူ့မှာလည်း ကျန်းမာရေးအာနိသင်မနည်းပါဘူးနော်။

၁။ ကင်ဆာ ဖြစ်နိုင်ခြေ လျော့နည်းစေ။

ပန်းဂေါ်ဖီ၊ ပန်းဂေါ်ဖီစိမ်း (Broccoli)၊ ဂေါ်ဖီထုပ်၊ ကိုက်လန်စသည်တို့ဟာ ဂေါ်ဖီမျိုးနွယ် ဟင်းသီးဟင်းရွက်တွေဖြစ်ကြပါတယ်။ ဂေါ်ဖီနွယ်ဝင် ဟင်းရွက်တွေစားပေးခြင်းဖြင့် ဆီးကြိတ်ကင်ဆာ၊ အူမကြီးကင်ဆာ၊ ပါးစပ်ကင်ဆာ၊အစာအိမ်ကင်ဆာနှင့် ပန့်ကရိယ ကင်ဆာ ဖြစ်နိုင်နှုန်းကိုလျော့နည်းစေတယ်လို့ သိရပါတယ်။

၂။ Vitamin C ကိုမြှင့်တင်ပေးသည်။

ခြစ်ထားတဲ့ ဂေါ်ဖီတစ်ခွက်စာဟာ ခန္ဓာကိုယ်ရှိ ရောဂါခုခံရေးစနစ်အတွက်လိုအပ်တဲ့ အာဟာရဓာတ် ၅၀ရာခိူနှုန်းပါရှိပါတယ်။ Vitamin C ဟာ ဆံပင်၊လက်သည်း နှင့် အသားအရေကျန်းမာရေးအတွက် အလွန်အရေးပါပါတယ်။

၃။ အမျှင်ဓာတ်လုံလောက်စွာပေးသည်။

လူအတော်များများ နေ့တစ်နေ့တာအတွက်လိုအပ်တဲ့ အမျှင်ဓာတ်လုံလောက်စွာမရရှိကြပါဘူး။ အမျှင်ဓာတ်ဟာ ကိုလက်စထရော ဓာတ်လျော့နည်းစေပြီး အစာခြေလမ်းကြောင်းကို ကောင်းမွန်စွာလည်ပတ်စေပါတယ်။ဂေါ်ဖီထုပ်တစ်ခွက်မှာ တစ်နေ့တာအတွက်လိုအပ်တဲ့ အမျှင်ဓာတ် ၉ရာခိုင်နှုန်းပါဝင်ပါတယ်။

၄။ ကိုယ်အလေးချိန်လျော့နည်းစေသည်။

ချက်ထားတဲ့ ဂေါ်ဖီထုပ်တစ်ခွက်ထဲမှာ ၃၃ ကယ်လိုရီသာ ပါဝင်တဲ့အတွက် ကိုယ်အလေးချိန်လျှော့ချတဲ့အခါမှာစားပေးသင့်ပါတယ်။

၅။ ဦးနှောက်ကို ကျန်းမာစေသည်။

ဂေါ်ဖီထုပ်ထဲမှာ ဦးနှောက်ကျန်းမာရေးနှင့် အာရုံစူးစိုက်မှုကို မြှင့်တင်ပေးတဲ့ Vitamin K နဲ့ Anthocyanins ပါဝင်ပါတယ်။ ယင်းအာဟာရဓာတ်တွေဟာ အာရုံကြောချို့ယွင်းမှု၊ ဦးနှောက်အမြေးပါးရောင်ရောဂါနှင့် ရူးသွပ်ခြင်းမှကာကွယ်ပေးတယ်လို့သိရပါတယ်။

အခုဆို ဂေါ်ဖီထုပ်ရဲ့ အာနိသင်သိရပြီဆိုတဲ့အတွက် အသုပ်တွေမှာပဲဖြစ်ဖြစ်ဟင်းခါးတွေထဲပဲဖြစ်ဖြစ် အမြဲလိုလိုစားသုံးခြင်းက အကျိုးပြုပါလိမ့်မယ်။

===========

MyFood Myanmar

ကိုယ်အလေးချိန် အနည်းငယ် လျှော့ချနိုင်ရုံဖြင့် ကြီးမားသော ကျန်းမာရေးအကျိုးကျေးဇူးများရနိုင်

============

သာမန်ထက်ပိုများနေသော ကိုယ်အလေးချိန်ကို အနည်းငယ်လျှော့ချနိုင်ရုံဖြင့် ကျန်းမာရေးအတွက် ကြီးမားသော အကျိုးကျေးဇူးများ ရရှိနိုင်ကြောင်း Cell Metabolism ဂျာနယ်တွင် ဖော်ပြထားသော လေ့လာမှုတစ်ရပ်က ဖော်ပြသည်။
ကိုယ်အလေးချိန် လျှော့ချရခက်နေပြီး စတင်ရန် ခက်ခဲနေသော်လည်း ကိုယ်အလေးချိန် ငါးပေါင်မှ ၁၀ ပေါင်အထိ လျှော့ချနိုင်ခြင်းသည် ပေါင် ၅၀ အထိ လျှော့ချရန် ပထမခြေလှမ်းဖြစ်သည်ဟု သုတေသီများကပြောသည်။

ကိုယ်အလေးချိန် လျော့ကျခြင်းကြောင့် ခန္ဓာကိုယ်၏ အဆီများနှင့် ကိုယ်တွင်းအင်္ဂါများတစ်ဝိုက်ရှိ အဆီများ လျော့ကျသွားစေနိုင်သည်။ အသည်းတစ်ဝိုက် အဆီများလည်း လျော့ကျသွားပြီး သွေးပေါင်လျော့ကာ အင်ဆူလင်ကို ခန္ဓာကိုယ်က အသုံးချနိုင်မှု ပို အားကောင်းလာနိုင်သည်။

ကိုယ်အလေးချိန်များခြင်းကြောင့် သွေးထဲရှိ ကိုလက်စထရော ပမာဏမြင့်မားပြီး နှလုံးသွေးကြောများထဲတွင် အဆီကဲ့သို့သောအရာများ ဖြစ်ပေါ်ကာ နှလုံးရောဂါဖြစ်နိုင်သည့် အန္တရာယ်မြင့်မားသည်။ ကိုယ်အလေးချိန်ကို ၁၀ ပေါင်ခန့် လျှော့ချနိုင်ခြင်းဖြင့် မကောင်းသော ကိုလက်စထရောပမာဏကို လျော့ကျစေနိုင်သည်။

ကိုယ်အလေးချိန်ကို ကျန်းမာရေးနှင့်ညီသော နည်းလမ်းဖြင့် လျှော့ချခြင်းကြာင့် အသည်းလုပ်ဆောင်ချက် ပိုအားကောင်းလာပြီး အိပ်စက်ရပိုကောင်းခြင်းနှင့် ခြောက်လအတွင်း စိတ်နှင့်ကိုယ် ပေါ့ပါးခြင်းကဲ့သို့ အကျိုးကျေးဇူးများ ရရှိနိုင်သည်။

အစားအသောက်ဆင်ခြင်ပြီး ၁၂ ပတ် လေ့ကျင့်ခန်းလုပ်ရုံဖြင့် ကိုယ်အလေးချိန် အနည်းဆုံးခြောက်ပေါင် လျှော့ချနိုင်ပြီး ခန္ဓာကိုယ်ရောင်ရမ်းမှုအန္တရာယ်ကို ကာကွယ်နိုင်သည်။

ထို့အပြင် လေ့ကျင့်ခန်းပြုလုပ်ခြင်းကြောင့် အရိုးအဆစ်များ သန်မာစေပြီး ကိုယ်အလေးချိန်များခြင်းကြောင့် ဒူးနှင့်အဆစ်များအပေါ် ဖိအားပိုလာကာ အန္တရာယ်ပေးနိုင်သည်။ ထို့ကြောင့် သာမန်ကိုယ်အလေးချိန်ကို ထိန်းသိမ်းရန် လိုအပ်ကြောင်း သုတေသီများကပြောသည်။

—Ref: MNT

===========

7Day News Journal

http://7daydaily.com/story/118045