Kandy Adz

“ඔයා මේ දේවල් වලට සූදානම් නැතිනම් රට යන්න එපා”

රට යන එක දැන් ගොඩක් දෙනෙක් ගේ හීනයක්. හැබැයි මේ රට යන එක, Flight Ticket එකේ photo එකක්, Flight එක ඇතුළේ photo එකක් Facebook දාලා ගන්න සතුටට වඩා ගොඩක් ගැඹුරට හිතන්න ඕනි දෙයක්. කොහේ හරි රටකට ගිහින් ඒ රටේ job එකක් කරන එක හෝ settle වෙන්න හිතන එක සම්පූර්ණ මානසික වෙනසක්.

ඉතින් ඔයත් රට යන්න බලාගෙන ඉන්න කෙනෙක් නම් ඔයා හිතලා බලන්න මේ දේවල් වලට ඔයා ලෑස්තියි ද කියලා. මේ දේවල් කියන්නේ ඔයාව රට යන එක ගැන අධෛර්යමත් කරන්න නෙවෙයි. ඒත් මේ ඇත්ත දැනගෙන යන එකෙන් ඔයාට ඒකට මනස සූදානම් කරගන්න පුළුවන්. එතකොට රට ගියාට පස්සේ ඔයාව ශොක් වෙන එක අඩු වෙනවා.

1️⃣ තනිකමට මුහුණදෙන්න සූදානම්ද?

රට යන ගොඩක් දෙනෙක්ට යන්න වෙන්නේ තමන්ගේ පවුලේ අයව ලංකාවේ දාලා. ඉතින් පවුලේ අය ළඟ ඉන්නකොට තමන්ට ලැබෙන මානසික සැනසීමත් එයාපෝට් එකෙන්ම දාලා යන්න වෙනවා. ඔයා ගැන හොයන්න කවුරුත් නැති වෙනවා. කෑවද බිව්වද කියලා හොයන්න, අසනීපයක් වුණාම ළඟින් ඉන්න කෙනෙක් ඔයාට නැති වෙනවා. ඉතින් මේ දේවල් වලට තනියම මුහුණ දෙන්නම වෙනවා.

2️⃣ භාෂාව වෙනස් වීමට මුහුණ දෙන්න සූදානම්ද?

"ඕක නම් ඉංග්‍රීසි චුට්ටක් කතා කරලා ගොඩ දාගන්න පුළුවන්" කියලා හිතන්න එපා. බොහොමයක් රටවල office, රජයේ දේවල්, සාමාන්‍ය ජීවිතේදි, ඉංග්‍රීසි භාවිතා වෙන්නේ අඩුවෙන්. ඒ නිසා අනිවාර්‍ය්‍යෙන්ම ඒ රටේ භාෂාව කතා කරන්න පුරුදු වෙන්නම වෙනවා. ඉංග්‍රීසි කතා කරන රටකට ගියත්, එයාලගේ උච්චාරණ විලාසය අල්ලගන්න පවා කාලයක් යන්න ඉඩ තියෙනවා. ඉතින් මේ වෙනසට ඔයා මුහුණ දෙන්නම වෙනවා.

3️⃣ Ego එක පැත්තකින් තියන්න පුළුවන්ද?

"මම ලංකාවෙදි Engineer, Doctor, Manager, Lawyer, Nurse" කියලා අපි හදාගෙන ඉන්න සමාජ තත්ව ඔක්කොම වෙන රටකදි අපිට අතාරින්න වෙනවා. මෙහේදි අපි හැමෝම විදේශිකයෝ. ඒ වගේම ගොඩක් දුරට ජොබ් එක මත සමාජ තත්වය තීරණය වෙන්නේ අඩුවෙන්. ඉතින් ඒ නිසා තමන්ගේ මහන්තත්තකම් ලංකාවෙම දාලා එන්න වෙනවා. තේරෙන භාෂාවෙන් කිව්වොත් "ජොබ් එක ඉස්සරහට දාගෙන ලංකාවේ වගේ රඟන්න නම් බෑ".

4️⃣ නීති අනුගමනය කරන්න ඉවසීමක් තියෙනවද?

ඒ ඒ රටවලට ආවේණික වුණ නීති රීති අනුගමනය කරන්න තරම් ඉවසීමක් ඔයාට තියෙන්න ඕනි. කෙළින්ම ඔෆිස් වලට ගිහින් වැඩ කරගන්නේ නැතුව appointment වලට විතරක් වැඩ කරගන්න වෙන වෙලාවල් තියෙනවා. පෝලිමේ ඉන්න වෙන තැන් වල පෝලිම් පනින්න ඇඳුරුම්කම් වලට shortcut වලින් වැඩේ ගොඩ දාගන්න වගේ වැඩ මේ රටවල් වල කරන්න අමාරුයි. කොටින්ම වාහන එකක් වත් පාරේ නැතත් පාර පනින්න කොළ එළිය පත්තු වෙනකංම ඉන්න වෙන වෙලාවල් තියෙන්න පුළුවන්. ඒ තරම් ඉවසීමක් අපිට තියෙන්න වෙනවා.

5️⃣ Work-life එකේ පීඩනය දරාගන්න පුළුවන් ද?

ගොඩක් වෙලාවට 'අයිස් ගහන්න' පුළුවන් ජොබ් ලැබෙන්නේ නෑ. වැඩ නම් වැඩම තමයි. තේ එකක් බොන්න ගිහින් කයිය ගහන්න, වැඩ කරන අය එක්ක පොඩි පොඩි චැට් දාන්න ලැබෙන අවස්ථා හරිම සීමිතයි. භාෂාව හරියට බැරිනම් රැකියාවෙදි මිතුරන් හදාගන්න එක පවා අමාරු වෙන්න පුළුවන්.

6️⃣ කාළගුණ වෙනස් වීම් වලට මුහුණ දෙන්න පුළුවන්ද?

සමහර රටවල winter එකට හිම වැටෙනවා. එළියේ වැඩ කරන අයට, පාන්දර වැඩට යන අයට සීතලත් එක්ක මේ දේවල් දරාගන්න පුළුවන් ද කියලා හිතන්න වෙනවා. ඒ වගේම ගොඩාක් කලින් ඉර බහිනවා. ඉක්මනට කළුවර වෙනවා. එතකොට නවාතැනට යන්න වෙන්නේ ගොඩාක් රෑ වෙලා. සමහර රටවල් සමර් එකට ගොඩාක් රස්නෙයි. රස්නේ තැම්බෙන එකට මුහුණ දෙන්න පුළුවන් ද කියලා හිතන්න ඕනි. ඒ රස්නේ එළියේ වැඩ කරන්න වුණොත්? ඉතින් මේ දේවල් වලට මුහුණ දෙන්නම වෙනවා.

7️⃣ අනිත් අය එක්ක සංසන්දනය කරලා බලන එක නතර කරන්න පුළුවන්ද?

රට එන එක එක පුද්ගලයන්ගේ අරමුණු වෙනස්. ඉතින් සමහරු එන්නෙම සම්පූර්ණ මුදලම ලංකාවට යවන්න බලාගෙන. සමහරු එන්නේ ඒ රටේ settle වෙන්න බලාගෙන. ඉතින් ඒ නිසා අරයා ගෙයක් ගත්තා, අරයා කාර් එකක් ගත්තා, එයා PR ගත්තා, එයා දැන් සිටිසන් වගේ අනිත් කෙනා එක්ක තමන්ව සංසන්ධනය කරන එක නතරකරගන්න පුළුවන් වෙන්න ඕනි. එහෙම නැති වුණොත් තමන් රට එන එකේ අරමුණට තමන්ට යන්න බැරි වෙනවා. ඒ නිසා ඒ සංසන්ධනය කිරීමත් පැත්තකින් තියන්න ඔයාට පුළුවන් වෙන්න ඕනි.

8️⃣ අම්මා තාත්තා, නෑදෑයොන්ගෙන් වෙන් වෙලා ඉන්න එක දරාගන්න පුළුවන්ද?

අම්මලා තාත්තලා දවසින් දවස වයසට යනවා. හදිස්සියේ එයාලා අසනීප වුණත් ඔයාට ඉක්මනට යන්න බෑ. ළඟ ඉන්න යන්න බෑ. ඉතින් එයාලා වයසට යන කාලේ එයාලා එක්ක ඉන්න වෙන්නේ නැති වෙන එකට ඔයා ලෑස්තිද කියලා හිතන්න ඕනි.
නෑදෑයොන්ගේ දේවල් වලට ඔයාට කලින් වගේ ලේසියෙන් සහභාගි වෙන්න බෑ. මගුලකට මළගෙදරකට දානෙකට ඔයාට ලේසියෙන් යන්න බෑ. ආපහු ලංකාවට යන්න ලොකු මුදලක් යනවා. ඒ නිසා ඒක දරාගන්න ඔයාට පුළුවන් වෙන්න ඕනි.

9️⃣ දිගුකාලීන සැලසුම් වලට ඔයාට ඉවසීම තියෙනවද?

සාමාන්‍යයෙන් රට එන අපි හැමෝගෙම පළවෙනි අවුරුද්ද ලේසි නැහැ. කොච්චර ලොකු පඩියක ජොබ් එකකට ආවත් මුල් කාලේ settle වෙන්න ලොකු කට්ටක් කන්න වෙනවා. ඒ නිසා ඒ කට්ට කාගෙන දිගුකාලීන සැලසුම් හදන්න තරම් ඉවසීමක් ඔයාට තියෙන්න ඕනි. මුල් කාලේ කට්ට නිසා 'මේක නම් හරියන්නෑ' කියලා දාලා යන්න හිතෙන තරම් ඔයාගේ ඉවසීම අඩුයි නම් රට එන එක ගැන ඔයා දෙසැරයක් හිතන්න වෙනවා.

🔟 ඔයාටම කියලා අලුත් අනන්‍යතාවක් හදාගන්න ලෑස්තිද?

ඒ ඒ රටවලට ආවේණික සංස්කෘතික වෙනස්වීම් වලට ඔයා ලෑස්ති වෙන්න ඕනි. ජර්මනිය වගේ රටක නම් ඉරිදට සද්ද බද්ද කරන්නේ නැතුව ඉන්න එක, පල්ලියේ සද්ද ඇහෙන එක, ඉස්ලාම් ආගම අදහන රටක නම් ඒ ආගමේ ආගමික පාඨ නිතර ඇහෙන එක, වගේ දේවල් දරාගන්න අපිට පුළුවන් වෙන්න ඕනි. ඒ වගේම ඒ ඒ රටවල් වල උච්ඡාරණය හරියට අවබෝධ කරගෙන ඒකට හැඩගැහෙන්න ඕනි. තමන් ඒ ඒ රටට අනුගත වෙලා තමන්ගේ අනන්‍යතාවක් හදාගන්න ඕනි. මේ දේටත් ඔයා සුදානම් වෙන්න ඕනි. එහෙම ඒ රටට අනුගත වුණොත් තමයි ඔයාට ඒ රටේ ලොකු ගමනක් යන්න පුළුවන් වෙන්නේ.

+ ඉතින්… එතකොට ඔයා වෙන රටකට නොයා ඉන්න ඕනිද?
- නෑ.

👉 මේ දේවල් වලට සූදානම් අයට පිටරට ජීවිතේ කියන්නේ අභියෝගාත්මක හොඳ වෙනසක්.
👉 මේ දේවල් වලට සූදානම් නැති අයට පිටරට ජීවිතේ කියන්නේ ජීවිතේ මහ කට්ටක්.

රට යන එක සුදුසු කාටද?

✅ තමන්ගේ Comfort zone එකෙන් එළියට ඇවිත් ගොඩනැගෙන්න කැමති අයට

✅ ඉගෙනගැනීමේ මානසිකත්වයක් තියෙන අයට

✅ තනියම තමන්ගේ දේවල් ගොඩනගාගන්න හැකියාව තියෙන අයට

ඉතින් ඔයත් රට යන්න හිතනවා නම් ඒක හීනයක් කියලා හිතලා යනවට වඩා, ඒක reality එකත් එක්ක mix වුණ අභියෝගයක් කියලා දැනගෙන යන්න.

~ රන්දුනු
දෙසැම්බර් 24, 2025

අලුයම 3 සිට 5 දක්වා ඔබේ දිවිය උඩු යටිකුරු කරවන විශ්වීය රහස

බොහෝ දෙනෙකුට අලුයම 3 සිට 5 දක්වා කාලය යනු තද නින්දේ පසුවන සාමාන්‍ය රාත්‍රී කාලයක් පමණක් වුවද, පෞරාණික ප්‍රඥාවට හා ආධ්‍යාත්මික විද්‍යාවට අනුව මෙය දවසේ පවතින අතිශය බලගතුම කාල පරාසයයි. මෙම කාලය සාමාන්‍ය නින්දකට යට කර දමනවාට වඩා, එය ඔබේ ආත්මීය පිබිදීම සහ ලෞකික ජයග්‍රහණ වෙනුවෙන් ආයෝජනය කළ හැකි රන්වන් අවස්ථාවකි. මෙම නිශ්ශබ්ද හෝරා දෙක තුළ ඔබේ මනස, ශරීරය සහ විශ්වය අතර පවතින්නේ පුදුමාකාර සම්බන්ධතාවයකි. මුළු ලෝකයම නිහඬව පවතින විට අවදි වී සිටීමෙන් ඔබට ඔබේ අභ්‍යන්තර හඬට සවන් දීමටත්, දවස සාර්ථක කර ගැනීමට අවශ්‍ය මානසික ශක්තිය ගොඩනඟා ගැනීමටත් හැකි වේ.

මෙම සුවිශේෂී කාල පරාසය ආයුර්වේදය සහ යෝග දර්ශනය තුළ හඳුන්වනු ලබන්නේ බ්‍රහ්ම මුහුර්තය ලෙසයි. මෙය සරලව අර්ථකථනය කරන්නේ නම් "නිර්මාපකයාගේ හෝරාව" ලෙස හැඳින්විය හැකිය. තාක්ෂණිකව ගත් කල හිරු උදාවීමට පැය 1යි විනාඩි 36කට පෙර ආරම්භ වී හිරු උදාවට විනාඩි 48කට පෙර අවසන් වන මෙම කාලය දළ වශයෙන් අලුයම 3:30 සිට 5:30 දක්වා පවතී. මෙම කාලය තුළ පරිසරයේ සහ විශ්වයේ පවතින ශක්තිය හෙවත් ප්‍රාණ ශක්තිය ඉතා ඉහළ මට්ටමක පවතින අතර, එම ශක්තිය උරා ගැනීමට මිනිස් මනසට සහ ශරීරයට ඇත්තේ ඉහළ හැකියාවකි. ඔබේ මනස දවස පුරා පවතින කලබලකාරී ස්වභාවයෙන් මිදී ඉතාමත්ම පිරිසිදු, නිශ්චල සහ ධාරණ ශක්තියෙන් ඉහළ මට්ටමකට පත්වන්නේ මෙම යාමයේදීය.

විද්‍යාත්මකව සහ මනෝවිද්‍යාත්මකව බලන විට මෙම කාලයේදී අපගේ මනස මනෝභාව හෙවත් උපවිඥානය සමඟ ඉතා සමීපව කටයුතු කරයි. දිවා කාලයේදී අපගේ මොළය තර්කානුකූලව සහ වේගවත්ව ක්‍රියා කළද, අලුයම අවදි වන විට මොළය පවතින්නේ ගැඹුරු ඉහිල් තත්ත්වයකයි. මෙම තත්ත්වය තුළ ඔබ සිතන ඕනෑම සිතුවිල්ලක් හෝ ප්‍රාර්ථනාවක් ඉතා පහසුවෙන් ඔබේ යටි සිත තුළ තැන්පත් වේ. ඔබ ඔබේ ජීවිතයට සතුට, ධනය, නිරෝගීකම හෝ සාර්ථකත්වය අපේක්ෂා කරන්නේ නම්, එය දැනටමත් ලැබී ඇතැයි සිතින් මවා ගැනීමටත්, ඒ පිළිබඳව ධනාත්මක ආකල්ප ඇති කර ගැනීමටත් සුදුසුම කාලය මෙයයි. මෙම කාලයේදී ඇති කරගන්නා අරමුණු බීජයක් ලෙස යටි සිතේ රෝපණය වන අතර එය යථාර්ථයක් බවට පත් කර ගැනීමට විශ්වීය ආකර්ෂණ නීතිය ක්‍රියාත්මක වීමට පටන් ගනී.

ඇතැම් විට ඔබට අනතුරු ඇඟවීමකින් තොරව අලුයම 3ට පමණ නින්දෙන් ඇහැරෙන අවස්ථා තිබිය හැකිය. මෙවැනි අවස්ථාවලදී බොහෝ දෙනා බියට පත්වීම හෝ නැවත බලෙන්ම නින්දට යාමට උත්සාහ කිරීම සාමාන්‍ය ස්වභාවයයි. නමුත් සත්‍ය වශයෙන්ම එය විශ්වය විසින් ඔබට ලබා දෙන පණිවිඩයක් විය හැකිය. එවැනි මොහොතක කලබල නොවී, ඔරලෝසුව දෙස නොබලා සන්සුන්ව සිටීම වැදගත්ය. මෙය නින්ද අහිමි වීමක් නොව, ඔබේ ආත්මය උසස් තලයකට පිවිසීමට සූදානම් බවට ලැබෙන සංඥාවකි. එවිට කළ යුත්තේ ඇඳේ පෙරළෙමින් සිටීම නොව, සෙමින් ඇඳෙන් නැගිට දෑස් පියාගෙන ගැඹුරු හුස්ම ගැනීමේ අභ්‍යාසයක හෝ නිහඬ භාවනාවක නිරත වීමයි.

මෙම වටිනා කාලය ඵලදායීව භාවිතා කිරීමට නම් නිවැරදි දින චර්යාවක් අනුගමනය කිරීම අත්‍යවශ්‍ය වේ. අවදි වූ වහාම ඇඳෙන් බැස මුහුණ කට සෝදා පිරිසිදු වීමෙන් නින්දේ අලස බව දුරු කර ගත හැකිය. ඉන්පසු ජලය වීදුරුවක් පානය කිරීමෙන් ශරීරය අභ්‍යන්තරව අවදි කර සජලනය කළ යුතුය. අනතුරුව ඔබට පුළුවන් විනාඩි කිහිපයක් භාවනා කිරීමට හෝ ඔබේ ආගමික වතාවත්වල නිරත වීමට. පරිසරයේ ඇති නිශ්ශබ්දතාවය නිසා ඔබේ සිත ඉක්මනින් සමාධිගත කර ගැනීමට හැකි වන අතර සිතුවිලි පාලනය කිරීම පහසු වේ. ඉන්පසුව දවස සැලසුම් කිරීම, කෘතඥතා පූර්වක වීම සහ ජීවිතයේ ඔබට ලැබී ඇති දේවල් ගැන සතුටු වීම තුළින් දවස ඉතා ධනාත්මකව ආරම්භ කිරීමට හැකි වනු ඇත.

බ්‍රහ්ම මුහුර්තයේ අවදි වීම සාර්ථක කර ගැනීමට නම් ඊට පෙර දින රාත්‍රියේ සූදානම ඉතා වැදගත්ය. ඔබට අලුයම 4ට අවදි වීමට අවශ්‍ය නම් අනිවාර්යයෙන්ම රාත්‍රී 9 පමණ වන විට නින්දට යා යුතුය. මන්ද ශරීරයට අවශ්‍ය පැය 7ක හෝ 8ක සුවපහසු නින්ද නොලැබුණහොත් මෙම පුරුද්ද සෞඛ්‍යයට අහිතකර විය හැකි බැවිනි. නින්දට යාමට පැයකට පමණ පෙර ජංගම දුරකථන සහ රූපවාහිනී තිරවලින් ඈත් වීම, සැහැල්ලු පොතක් කියවීම හෝ සන්සුන් සංගීතයකට සවන් දීම මගින් ගැඹුරු නින්දක් ලබා ගත හැකිය. මුලදී මෙම වේලාවට අවදි වීම අපහසු විය හැකි නමුත්, දින 21ක් පුරා එක දිගට මෙම පුරුද්ද පවත්වාගෙන ගියහොත් එය ඔබේ ජීවන රටාවේම කොටසක් බවට පත්වනු ඇත. මෙම වෙනස තුළින් ඔබට පෙර නොවූ විරූ මානසික පැහැදිලිකමක්, ශක්තියක් සහ ජීවිතය ජය ගැනීමේ විශ්වාසයක් ගොඩනැගෙනු ඇත.
උපුටාගැනීමකි.

තාම ඉවර නෑ.....🥺

ආධාර / උපකාර සහ සහන ලැබීම් සම්බන්ධව ඔබේ අදහස කුමක්ද ?
***********
රටටම විතරක් නෙවෙයි ලෝකේටම පේන්න Share කරමු..!