DOLPA BOYZ

༡))ཕམ་པའི་མཚན་ཉིད།
[མཚོ་ཊཱིཀ་ཉི་མའི་འོད་ཟེར་ལས།]= བསྙེན་རྫོགས་ཀྱི་བཅས་པ་ལས་འདས་པའི་ལྟུང་བ་དངོས་གཞི་རྫོགས་པ་ཡིན་ཞིང་རང་གི་ངོ་བོའི་ཆ་ནས་དགེ་འདུན་ལྷག་མ་མན་ཆད་ལ་ལྟོས་ནས་ཆད་པ་ལྕིར་རུང་དང་ལྡན་པའོ།

[ སྡོམ་གསུམ་དཔག་བསམ་སྙེ་མ་ལས]=བསྙེན་པར་རྫོགས་པའི་རྒྱུད་ཀྱི་བཅས་འགལ་གྱི་ལྟུང་བ་གང་ཞིག། རང་གི་དག་བྱེད་བསླབ་པ་བྱིན་ནས་སྤྱོད་པའི་རིགས་གནས།

༢))ཕམ་པ་བཞི།
༡ མི་ཚངས་སྤྱོད་པ།
༢ མ་བྱིན་ལེན་པ།
༣ སྲོག་གཅོད་པ།
༤ རྫུན་སྨྲ་བ།

དེ་དག་གི་གླེང་གཞི་དང་ཇི་ལྟར་ཉམས་ཚུལ་རྒྱས་བསྡུས་ཚམ་པོ་ཞིག་གཤམ་ནས་མར་བཤད་པ་ལ།

དང་པོ། མི་ཚངས་སྤྱོད་ཀྱི་ཕམ་པ།

༡ གླེང་གཞི་།

དེ་ཡང་སྟོན་པ་མངོན་པར་རྫོགས་པ་སངས་རྒྱས་ནས་ལོ་བཅུ་གསུམ་པ་ལ་ཡུལ་ཀ་ལན་ད་ཀ་ན་གནས་པའི་གྲོང་ན་བཞུགས་སོ།

དེ་ཡི་ཚེ་ན་རྒྱུ་ནོར་སོགས་ལ་ཧ་ཅང་ཕྱུག་པའི་ཁྱིམ་ཞིག་ན་བཟང་བྱིན་ཞེས་པ་ཞིག་ཡོད་པ་དང། དེ་ཡང་རབ་ཏུ་བྱུང་ནས་གནས་པའོ། དེ་ནས་ཁྱིམ་དེ་ལ་བུ་བཟང་བྱིན་གཅིག་ལས་གཞན་མེད་སྟབས། དེའི་མས། བུ་ཁྱོད་ཀྱི་ཁྱིམ་དུ་ཕ་མའི་ནོར་རྒྱ་ཆེན་པོ་ཡོད་པ་ལ། བདག་ཅག་བཟའ་བྲན་རྒས་ཏེ་ཤི་བར་གྱུར་ན་ནོར་ཀུན་ཀྱང་རྒྱལ་པོས་ནོར་དུ་འགྱུར་པས། ཁྱོད་སླར་འབབས་སུ་མི་རུང་ནའང། འུ་ཅག་ལ་ས་བོན་བུའམ་བུ་མོ་གང་རུང་ཞིག་ཞོག་ཅིག་བཅས་སྨྲས་སོ། དེ་ནས་སྐབས་དེར་མི་ཚངས་སྤྱོད་པའི་བཅས་པ་སོགས་མེད་པས། དགེ་སློང་བཟང་བྱིན་གྱིས་ཀྱང་དེ་ལྟར་བྱས་ན་གྲིག་སྙམ་ནས།
སྔར་གྱི་ཆུང་མ་ཟླ་མཚན་ལྡན་ཞིང་དུས་ལ་བབ་པ་གསེར་དངུལ་སོགས་རྒྱན་་གྱིས་བརྒྱན་ཏེ་མས་ཁྲིད་འོང་བ་དང། དེས་ཀྱང་སྤྱད་དོ། དེ་ནས་དུས་ཡུན་མི་རིང་བ་ཞིག་ན། རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་ཀྱིས། དུས་གསུམ་གྱི་ཉེས་པ་བཤད་པས། བཟང་བྱིན་གྱིས་རང་གིས་སྔར་གང་བྱས་པ་རྣམས་ཉེས་པ་ཡིན་པ་དྲན་ནས་འགྱོད་ཅིང་མི་དགའ་བ་ལ། ཉེ་འཁོར་དུ་ཡོད་པའིདགེ་སློང་གཞན་རྣམས་ཀྱིས་དྲིས་པས། དེས་ཀྱང་སྔར་བྱུང་བ་རྣམས་དྲང་པོར་སྨྲས་སོ། དེ་ནས་དགེ་སློང་དེ་དག་གིས་སངས་རྒྱས་ལ་གསོལ་བས་། བཟང་བྱིན་ལ་རྣམ་པ་དུ་མས་སྨད་ནས་སྐབས་དེར་རྒྱལ་བས་མི་ཚངས་སྤྱོད་པའི་ཕམ་པ་ཡི་བླང་དོར་རྣམས་ལེགས་པར་གསུངས་ནས། མི་ཚངས་སྤྱོད་པའི་བཅས་པ་དེ་མཛད་པའོ།

མ་ཟད་ཕམ་པ་བཞིའི་ནང་ནས་མི་ཚངས་སྤྱོད་ཀྱི་ཕམ་པ་དེ་ཡང་ཐོག་མ་མཛད་དོ།

ཇི་ལྟར་མི་ཚངས་སྤྱོད་ཀྱི་བསླབ་པ་ཉམས་ཚུལ།

སྡོམ་ཅན་འདུ་ཤེས་ཉམས་པ་མེད་པའི་གང་ཟག་གི་སེམས་ཀྱིས། ཉམས་པ་གང་ཡང་མེད་པའི་སྒོ་གསུམ་[ ༡ གཤང་ལམ། ༢ ཁ། ༣ ཆུ་ལམ།] དུ་བཅོས་མིན་གྱི་ཆགས་པས་རང་གི་ལས་སུ་རུང་བའི་ནོར་བུ་ཡི་སྤགས་སྦུབས་སོ་ལས་རྩེ་མོ་ཙམ་ཡང་ནང་དུ་འདས་ཏེ་མཐར་ཐུག་རེག་པའི་དགའ་བ་ལུས་དང་སེམས་ཀྱིས་འཚོར་ཞིང་ཡིད་ཀྱིས་དང་དུ་བླངས་ན་མི་ཚངས་སྤྱོད་ཀྱི་ཕམ་པ་བྱུང་བས་བརྟུལ་ཞུགས་ཉམས་ཏེ་ཕམ་པར་འགྱུརརོ།
དེ་ཡང་ཀཱ་རི་ཀའི་རྩ་བ་ལས།
སྡོམ་ཅན་ཉམས་པ་མེད་སེམས་ཀྱིས།།
ཉམས་པ་མེད་པའི་སྒོ་གསུམ་དུ།།
ཆགས་པས་ནོར་བུ་ནང་དུ་འདས།།
དགའ་བ་འཚོར་ན་བརྟུལ་ཞུགས་ཉམས།།
ཞེསགསུངས་པ་དང། ས་གའི་ལྷས།
ཁ་ཤུན་སོ་དང་ལྤགས་པ་ལས།།
ནོར་བུ་འདས་ན་ཕས་ཕམ་སྟེ།

ཞེས་གསུངསསོ། མདོར་ན་ཡན་ལག་བཞི་[གཞི་ བསམ་པ སྦྱོར་བ་་མཐར་ཐུག] ཚང་བའི་སྒོ་ནས་ཉམས་པ་མེད་པའི་སྒོ་གསུམ་གང་རུང་ལ་སྤྱད་ན་མི་ཚངས་སྤྱོད་པའི་ཕམ་པ་དངོས་གཞིར་འགྱུར་རོ།

ཡན་ལག་བཞི་ཚང་ཚུལ།

༡) གཞིའམ་ཡུལ།
ཉམས་པ་མེད་པའི་སྒོ་གསུམ་གང་རུང་ལ།
༢) བསམ་པ།
ངོ་ཚ་དང་སྟོན་པ་དང་བསྟན་པ་ལ་འཇིགས་སྐྲག་མེད་ཅིང་ཆགས་པར་གྱུར་པས་ཀུན་སློང་ཉམས་སུ་མྱོང་འདོད་ཀྱིས།
༣) སྦྱོར་བ།
བརྟེན་བྱར་སྩལ་ཞིང་དྲུད་པས།
༤) མཐར་ཐུག་
ལམ་གསུམ་གྱི་མཚམས་ལས་འདས་ནས་སིམ་པ་ཐོབ་སྟེ། བདེ་བ་ལུས་ཀྱིས་མྱོང་ཞིང་ཡིད་ཀྱིས་བདག་གིར་བྱས་པའོ།།

དེ་ཡང་མངའ་རིས་པཎ་ཆེན་པདྨ་དབང་རྒྱལ་གྱི་སྡོམ་གསུམ་རྩ་བ་ལས།

གཞི་ཡི་ཡན་ལག་ཆ་ཀུན་གཟུང་འོས་པ།།
སྐྱེ་གནས་ལམ་དུ་ཕོ་དབང་ལས་རུང་ནི།། བསམ་པ་ངོ་ཚ་འཇིགས་མེད་ཆགས་སེམས་ཀྱིས།།
སྦྱོར་བ་དྲུད་པ་མཐར་ཐུག་སིམ་པ་ཐོབ།།
དེ་ནི་ཚངས་པར་སྤྱོད་ལས་རྣམས་པར་ཉམས།།

ཞེས་སོ

Part 2 coming soon 👋,😄✌️