Shahu Chhatrapati Foundation

शाहू जयंतीनिमित शाहू छत्रपती फौंडेशनतर्फे शाहू शिधा उपक्रमाचा शुभारंभ
शाहू जन्मस्थळ येथे कार्यरत कंत्राटी महिला कर्मचाऱ्यांना शिधा वितरित करून शाहू शिधा उपक्रमाचा श्रीगणेशा

लोकराजा राजर्षी शाहू महाराजांच्या लोकोत्तर कार्याचा प्रचार आणि प्रसार या कार्याला वाहून घेतलेली संस्था म्हणून कोल्हापूरच्या शाहू छत्रपती फौंडेशनने आपली ओळख निर्माण केलीय. शाहू महाराजांवरील संशोधनाला वाहून घेतलेले प्रख्यात इतिहास संशोधक डॉ. जयसिंगराव पवार यांच्या मार्गदर्शनाखाली गेली चौदा वर्षे शाहू छत्रपती फौंडेशन कार्यरत आहॆ. शाहू महाराजांच्या कार्याला वाहिलेली जगातील एकमेव दिनदर्शिका ठरलेल्या राजर्षी या दिनदर्शिकेचे प्रकाशन, शालेय वयातच मुलांना राजर्षी शाहू महाराजांच्या कार्याची जवळून ओळख व्हावी, यासाठी घेतली जाणारी ' शाहू - आचार - विचार आणि प्रसार ही परीक्षा, ग्रामीण भागातील शालेय मुलींना सायकल वाटप, राजर्षी शाहू महाराजांच्या कार्याचा प्रचार - प्रसार करण्यासाठी विविध चर्चासत्रे, व्याख्यानांचे आयोजन, शाहू विचारांच्या प्रसाराला वाहून घेतलेल्या शिक्षक, सामाजिक कार्यकर्ते, पत्रकारांचा राजर्षी शाहू पुरस्काराने गौरव या कार्याच्या माध्यमातून शाहू छत्रपती फौंडेशन कार्यरत आहॆ.
गेली चौदा वर्षे अविरत पणे या संस्थेच्या शाहू विचारक कार्यकर्त्यांनी आपापली नोकरी, व्यापार, व्यवसाय सांभाळत शाहू महाराजांच्या लोकोत्तर कार्याच्या प्रचार आणि प्रसाराला वाहून घेतले आहॆ.
यावर्षीपासून शाहू महाराजांच्या 152 व्या जयंतीचे औचित्य साधून शाहू छत्रपती फौंडेशनच्या शाहू शिधा या नावीन्यपूर्ण उपक्रमाचा शुभारंभ करण्यात आला. लक्ष्मीविलास पॅलेस अर्थात राजर्षी शाहू महाराजांचे जन्मस्थळ असलेल्या वस्तू संग्रहालयात कार्यरत असलेल्या दोघा कंत्राटी महिला कर्मचाऱ्यांना शाहू शिधा वितरित करून या उपक्रमाचा अनोपचारिक शुभारंभ करण्यात आला. शाहू जन्मस्थळ परिसरात राजर्षी शाहू महाराजांना अभिवादन करून या शिधा वाटप उपक्रमाचा श्रीगणेशा करण्यात आला. श्रीमती वत्सला वरुटे आणि महाबुबी मुल्लाणी या दोघा कंत्राटी महिला कर्मचाऱ्यांना शाहू शिधा कीट वितरित करण्यात आले. संस्थेचे अध्यक्ष प्रा. जॉर्ज क्रुज, सचिव जावेद मुल्ला, सदस्य नवाब शेख, युवराज कांबळे यांच्या प्रमुख उपस्थितीत हा कार्यक्रम झाला. नवाब शेख यांनी आपल्या प्रस्ताविकात संस्थेच्या कार्याची माहिती दिली. संस्थेचे अध्यक्ष प्रा. जॉर्ज क्रुज यांनी यापुढे दरवर्षी शाहू जयंतीला शाहू शिधा वाटप मोठ्या प्रमाणात करण्याचा मनोदय व्यक्त केला. सचिव जावेद मुल्ला यांनी आभार मानले. त्यानंतर शहरातील आणि जिल्ह्याच्या ग्रामीण भागातील श्रमिक, उपेक्षित, निराधार कुटुंबाना शाहू शिधा किटचे वाटप करण्यात आले.