NAILA Methodist Church

VAKARAUWAI - 13/06/2025
Macawa ni Vuvale
ULUTAGA: Me Da Tarova Na Kena Vakayacori Tiko Na Kucu Kei Na Itovo Kaukauwa Ena Loma Ni Vale
LESONI: 2 Samuela 13:1–22

TIKINA KOULA – 19:
"A sa kaburaka ki uluna na dravusa ko Tema, ka dresulaka na nonai sulu veivolavolai sa vakaisulu kina, a sa tabaka na uluna e na ligana, ka lako voli, a tagi tiko."

NA KENA I VAKAMACALA
Ena tikina koula ni noda lesoni ni kua e da vulica kina na tadoka ni vakasama, tagi kei na madua e yacovi Tema ena vuku ni ca e vakayacori vua. “A sa kaburaka ki uluna na dravusa ko Tema, ka dresulaka na nonai sulu veivolavolai sa vakaisulu kina, a sa tabaka na uluna e na ligana, ka lako voli, a tagi tiko.” Na ka vakaloloma e yacovi Tema e vu ga mai e na loma ni nona vuvale; mai vua sara ga na ganena ko Eminoni kei na wekana dina ko Jonatapi.
Na i tukutuku tabaki me baleta na kisi ni kucu e Viti e sa dua na i tukutuku veivakamaduataki dina. Ena yabaki 2023 e 299 taucoko era beitaki kina, ena yabaki 2024 era lewe 435 era beitaki kina, ena Janueri–Me 2025 e 73 taucoko era beitaki ena kisi ni kucu. Ena Jiune 03, 2025, e tabaki ena i tukutuku tabaki mai na tabana ni veibeitaki ni matanitu na veitukutuku oqo: e dua na cauravou yabaki 14 e sa beitaki ena rua na cala ni nona kucuva na ganena yabaki 12.
E vakaraitaka oqo na valenivolavola ni Darekita ni Veivakadodonutaki ni Matanitu ena nona i wiliwili ni vula o Me ka vakaraitaki ni kua. Na i wiliwili ni veika e yaco ena loma ni vale e vakaraitaka e vitu na ka e yaco erau veiwekani kina o ira na vakaleqai kei ira era beitaki. E dua na ka e yaco ka beitaki kina e dua na gonetagane yabaki 16 ena ono na cala ni nona vakalolomataka e dua na gone e yabaki 9. E dua na turaga yabaki 30 e beitaki ena nona vakalolomataki na luvena yabaki 12. E dua na cauravou yabaki 25 e beitaki ena nona vakalolomataki koya na tavalena yabaki 15.
Na veitukutuku tabaki oqo e sa vakawaqaca e dua na sikinala damudamu vei keda kece sara e Viti ka vakabibi vei keda na vuvale Lotu vaKarisito ni sa dodonu meda sa yadrayadravaki ka vakayacora e dua na ka ena kena tababokoci na cakacaka ni kucu se vakayacori tiko ni itovo kaukauwa ka lolovira oqo.
Sa dodonu me da tuvata ka sagata vakaukauwa sara na i tovo veibeci oqo ni kucu; baleta ni na sega ni yacovi koya walega ena siga e vakayacori kina vua na kucu, ia, e dua na mavoa kei na tadoka ni vakasama ena tara tu na nona bula ena nona bula taucoko.

ULUTAGA ME MASULAKI:
Me da masulaka me tababokoci ena noda veivuvale na kena vakayacori tiko na kucu kei na itovo kaukauwa ka lolovira vaka oqo.

1) NA VEIKA EDA CAKAVA VUNI NAI TUBUTUBU ENA VAKAVOTUI MAI ENA NODA VUVALE.
**2 SAMUELA 12:12 - Ko a cakava vakavuni ko iko ia ka'u na cakava na ka oqo e matadra kecega na Isireli, kei na mata ni siga.

2) E VAKALOLOMATAKI TEMA KO AMINONI NA GANENA ENA LOMA GA NI NORATOU VUVALE.
**2 SAMUELA 13:14 - Ia sa sega ni via vakarorogo vua ko koya; ka ni sa kaukauwa, ka malumalumu ko koya, sa rawai koya, ka vakacacana.

TINITINI
E sega ni talanoa rawarawa meda rogoca nai talanoa ni veivakasaurarataki keina veivakacacani e vakayacori ga ena loma ni nodratou vuvale.

Ia sa qai vakaloloma sara okoya sa vakayacori sara tiko e Viti ena gauna oqo me ratou sa vakamacalataka tiko mai na noda lotu ka koto ena I vakamacala e cake.

E vica na taro meda taroga, na cava na vuna e yaco tiko kina na veivakalolomataki sa torosobu duadua ka vakayacori tiko ena so na noda vuvale.Eda na walia rawa vakacava nai tovo torosobu oqo.

E levu na leqa e tara tiko noda vuvale ena gauna oqo sa dodonu meda na tarogi keda kina nai tubutubu. Ena vanua e sega ni vakayacori kina na loma ni Kalou, meda na namaka ni na curuma vakaveitalia na noda bula keina vuvale na kaukauwa ni meca keina ca..

Sa bibi dina meda sa sureti Jisu Karisito me Tui ka Turaga ni noda bula, noda vanua keina noda vuvale. Ia, kevaka eda na vakalecaleca tikoga, meda namaka ni noda vuvale sa na vaka na bai ni koro sa kabasu era na curu yani na meca keina ca, era na curu mai ka veicuruyaki kina.

E. M. E. N. I
Me kalougata saka na noda vuvale vakaturaga.
(Ai katalau vakayalo ni matakacaca)