Eyeonfit.com
Share
10/12/2021
الموضوع ده للناس اللي عاوزة تخس ومش عارفه تبطل اكل ، واللي عاوزين يزودوا معدل الحرق في الجسم، شويه حاجات صغيره ولكن هتفرق معاك كتير جدا في حياتك سواء في الحركه أو اللبس أو الشكل أو التنفس أو النوم أو التركيز و اخيرا الميزان.
اولا : حاول دايما السفره ميخلاش منها أو نوع خضار والسلطه هتكون ممتازة وياسلام لو تقطيعها يكون مكعبات كبيره، وبلاش توابل كتير فيها وياريت نتنجنب الملح و نبدله بالليمون او خل تفاح او معلقه زيت زيتون .
ثانيا : اشرب كاسين مياه كل ساعتين وفي ابلكيشن على جوجل بلاي أو اب ستور، عباره عن منبه يقولك انك لازم تشرب مياه دلوقت، والمياه مهمه كتير في حركه الأمعاء والجهاز الهضمي ، وغير أنها بتساعد على تنقيه الجسم.
ثالثا : المعجنات زي المخبوزات والبيتزا والمكرونات وغيرهم وامثالهم، عباره عن دقيق ابيض صافي وطبعا لو اتكلمنا في قد ايه له سلبيات كبيره على الجسم وأنه بيزود الدهون وتراكمها في الجسم خصوصا في مناطق معينه من الجسم مش هنخلص ، فالاحسن قلل منها بقدر الإمكان أو انساها لكل فين وفين.
رابعا: الارز، الرز معروف أن مفيش بيت مصري بيخلى منه وخصوصا الرز المصري برضو ياريت منكترش منه أو نبدله بالرز البسمتي صحي اكتر ومناسب لكل الناس .
خامسا : حاول تمارس اي نوع تمارين رياضيه حتى لو رياضه المشي، ولو مش متاح ليك تتمشي في أماكن مفتوحه، ممكن تتمشي في البيت عندك عباره عن عمل خطوات أو مشي في المكان مع رفع الركبتين لمده نصف ساعه.
سادسا: عشان تتخلص من دهون البطن، مش محتاج تلعب الف عده في تمرين البطن بالعكس أن كده بتأذي عضلات بطنك وضهرك مش بتفيدهم ولا انت بتحرق الدهون فيها، انت مجرد بتعملها تقويه ليس إلا وهي غرقانه في بحر من الدهون مش هيتحرق الا بنظام غذائي مناسب لحالتك.
سابعا : تمارين الاسكوات Squats جميله جدا ومناسبة لكل الناس شرط تلعبها بشكل صحيح عشان تساعدك تشد الفخذين ويكون شكلهم كويس وممكن تلعبها مجموعات 4 في 12 تكرار هيكون مناسب اوي بعد النص ساعه تمارين المشي .
ثامناً: تمرين البلانك plank Exercises، تمرين ممتاز للناس اللي بتنامي من ضعف في منطقه الجذع أو الكور Core، وكمان بتشد منطقه البطن السفليه اللي كل الناس بتعاني من تراكم الدهون فيها، وممكن تلعبها 4 مجموعات في 15 ثانيه او 10 ثواني ، وكل مره زود في الوقت مفيش مشكله.
تاسعاً: دهون الصدر مشكله برضو للناس اللي بتعاني من شكل الصدر عندها في ترهل أو دهون عاليه، ومش بيعرف يشتغل تمرين الضغط push up، نقدر نعوضه بتمرين اسهل اسمه shoulder taps وهتلاقي شكل التمرين في اليوتيوب، تقدر تلعبه 4 مجموعات في 14 تكرار .
اخيرا: خلي الموضوع بالنسبالك لايف ستايل اسلوب حياه تقدر من خلاله تفيد جسمك وصحتك وشكلك بشكل كبير جدآ بشويه حاجات خفيفه هتضيفها وتنفذها في يومك الموضوع مش محتاج منك غير 45 دقيقه بس .
