CompuHouse

عشرون عاماً من التطوّر

الداتا بتتسجل ازاى علي الهارد ؟
ء=====================
🎁معلهش بوست طويل بس لو انت مهتم بقيمه الداتا بتاعتك . فلازم تهتم انت ها تحطها على ايه ؟ مش بس نوع الهارد . لا وتعرف الداتا بتتسجل ازاى علي الهارد ؟ مش بس مجرد نوعه ومساحته...
🧐زى بالضبط لما بتروح تشترى موبايل . بتهتم مثلا بالكاميرا وإصدار الاندرويد وسعه البطارية والمساحه. بتهتم بكل ده وانت بتفاضل اكيد ما بين اكتر من تلفون. المفروض برضه وأنت ها تجيب هارد تحط عليه داتا تخص شغلك او داتا بالنسبالك مهمة جدا . لازم برضه تهتم برضه بمواصفات الهارد . مش مجرد حجمه ونوعه . يعنى ايه ؟
ها اكلمك النهارده عن سؤال مهم لازم نسأله:-
⏳الداتا بتتسجل ازاى على الهارد ؟
من غير لخبطه وتضخيم للامور .الداتا بتكتبها الهدود على الميديا او القرص . بطريقتين
1️⃣ طريقه قديمه اسمها CMR او PMR
2️⃣ وطريقه جديدة اسمها SMR
🤔 طب وانا ها استفاد ايه لما اعرف الداتا بتتسجل ازاى على الهارد ؟ انا عايز اشترى هارد كويس وخلاص 😴
📌 طول بالك . بص. الطريقة القديمه CMR كانت الداتا بتتسجل بالظبط زى الراجل اللى بيعمل الكنافه . دواير كده جنب بعض . وكل ما تقل المسافات بين الدواير بتاعه الكنافة كل لما تزيد كميه الكنافه على سطح الفرن اللى قدامه. يعنى سطح الفرن ثابت وهو بتحكم فى المسافات بين خيوط الكنافه .كل ما قلل المسافات بيبنهم ذادت كميه الكنافه اللى بيطلعها
⚠️ لذلك نفس الهارد بالظبط ها تلاقى ابعاد الهارد ال 500 بتاع اللابتوب او الهارد المح مول هى نفس ابعاد التيرا وال 2 و ال 3 وال 4 تيرا فى الطول والعرض .
اومال الداتا بتزيد ازاى كمساحه . انهم بيقللو المسافات بين التراكات فتزد عدد التراكات وتزيد مساحه الهارد
بس الموضوع مش بالمطلق لان لازم يسيب مسافات بين التراكات ها توصل لمرحه انه ما ينفعش تزود . لان الهيد عشان يكتب محتاج حارتين يمشى فيهم .اما عشان يقرا محتاج حاره واحده. ف لازم يسيب مسافة إجباري بين التراكات .
دى كانت conventional magnetic recording (CMR) او PMR
وبسبب اننا عايزين مساحات اكبر فى الهاردات وكمان سرعه اكبر عشان يفضل ينافس ال SSD ظهرت لتقنيه التانيه الجديدة
🎯 ا واسمها SMR
التقنيه دى قربت الفاضى من التراكات كأنه طبقه تانيه فقللت المساحات اكتر واكتر . وبالتالي ظهرت الهاردات الكبيره الان لغايه 16 تيرا
😱 بس التقنيه دى فى استعاده الداتا واصلاح الهارد زى الزفت .لأنها بتستخدم طبقتين من ال Translator . مش موضوعنا الان ها نحكى عنه بعدين
المهم انه التقنية دى الآن بستخدمها ال 3 شركات اللى بينتجو الهاردات فى العالم اللى هما ويسترن وتوشيبا وسيجيت .
⛑ مشكله التقنية الجديدة انه الكتابه عشان بيكتب بسرعه وعشان المسافات بين التراكات لا تذكر. فهو بيكتب بشكل عشوائي مش منظم . وبيستخدم الكاش او الذاكرة اللى موجودة فى الهارد عشان تساعد فى سرعه ده. وبينتظر فتره انه الجهازما بتقراش او بتكتب على الهارد ( فاتح الجهاز وسايبه) عشان يعيد فيها تنظيم الداتا مع نفسه عالهارد . زى defragment كده
🤔 طب افرض انا بفتح الجهاز وعلى طول شغال قرايه وكتابه ومسح ؟ سرفر مثلا ولا نظام ريد ولا نظام محاسبه الخ ؟
هو محتاج طبعا يعيد تنظيم الداتا وبالتالي لو مش ها تديله وقت يظبط نفسه بدون ما تعمل حاجه فها يبقى بطيء وها يبطأ اكتر.
📌 النقطه الان انه لو انت بقا ها تشرى هارد SMR عشان تستخدمه فى حاجه ها تقرا وتكتب باستمرار وطول الوقت زى ال RAID او السرفرات ف ما تشتريهوش .
بس الشركات ما بتكتبش على الهارد هو بيستخدم تقنيه ايه . فمثلا تروح تشترى هارد ويسترن احمر 2 تيرا مثلا .فما تعرفش هو بيستخدم اى تقنيه فلو ها تستخدم مثلا فى جهاز واحد هاردين يفضل يبقو بنفس التقنيه . او فى سرفر او فى ريد الخ
🚦بسبب الموضوع ده ويسترن ما كنتش بتكتب الهارد ده بتقنيه ايه PMR ولا SMR . لكن دلوقتى بقت لازم تكتب عشان المستخدم يعرف بيشرى ايه و لأيه.. عرفت انك لازم تعرف الداتا بتتسجل ازاى على الهارد !
⏳التقنية دى موجودة من اول ال 2 تيرا . فقبل ما تشترى اى موديل هارد . ادخل موقع الشركة اللى بتنتجه وشوف التقنيه اللى بيستخدمها هل مناسبه لجهازك ولشغلك ولا لأ

كيفية التفرقة بين أنواع الرامات