رقي -ROKI

عبدالشافي محمد ابن طنطا
الأول علي الإعدادية الأزهرية
عبدالشافي من المكفوفين اللي لازم كلنا نشجعه عبدالشافي بيقول أن حفظه للقرآن هو سر تفوقه

تخيل تسيب بيتك وأهلك علشان تروح تبدأ شغل جديد وبعد ساعات بس أهلك يستلموا منك رسالة صوتية بتقول فيها : أنا بخير بس متبلغوش البوليس وادفعوا الفلوس !!

ومن هنا بدأت واحدة من أبشع القضايا اللي هزت مصر كلها.. مينا موسى شاب عنده 20 سنة من المنيا معروف بأخلاقه واحترامه وسط الناس كلها. كان شغال ممرض في حضانات الأطفال وكل اللي يعرفه يشهد إنه كان طيب وجدع وبيساعد أي حد يطلب منه حاجة. ورغم سنه الصغير كان شايل هم أهله ومستقبل أخواته البنات.. وكان نفسه يكوّن نفسه بأي طريقة.

مينا مكانش شاب مستهتر.ده كان بيشتغل شغلانتين وبيشارك كمان في أعمال خير وخدمة تطوعية بدون مقابل.عشان كده كان محبوب جدًا في بلدته وكل الناس كانت بتقول عليه إنه جدع وابن أصول

لكن للأسف طيبته وثقته في الناس كانوا السبب في نهايته المأساوية. القصة بدأت لما صاحبه ميلاد قاله إن فيه فرصة شغل ممتازة في القاهرة.تمريض منزلي لرجل كبير في السن بمرتب كبير. وإقامة ببلاش. عرض مغري لشاب بيحلم يبني مستقبله.

في الأول أهل مينا كانوا قلقانين جدًا من السفر وأمه فضلت تطلب منه مايروحش لكن مينا كان شايف إن دي فرصة عمره وإن القاهرة ممكن تغيّر حياته كلها.

قبل سفره بيوم فضل يلف على أصحابه ويودعهم بطريقة خلت الكل مستغرب.
واحد من أصحابه بعتله رسالة وقاله: إيه يا ابني؟ إنت بتودعنا كأنك مش راجع!

وكأن قلبه كان حاسس إن النهاية قربت.. سافر مينا القاهرة وراح عند أخته يقعد الليلة عندها. وتاني يوم الصبح خرج علشان يروح يستلم الشغل في الزاوية الحمراء. الساعة١١ تقريبًا بعت رسالة لأهله: أنا وصلت واستلمت الشغل اطمنوا

وبعدها اختفى تمامًا. تليفونه اتقفل ومفيش حد عرف يوصله.أخته بدأت تقلق وكلمت أبوه وعمه.الكل حاول يتصل بيه لكن مفيش أي رد. وفجأة.. وصلت رسالة صوتية مرعبة من مينا: أنا بخير بس متبلغوش البوليس وادفعوا الفلوس علشان أرجع

أهله انهاروا وأبوه مكانش فاهم ابنه إزاي اتخطف وفي ساعات قليلة بس! وبعدها بدقائق. ست اتصلت بيهم وقالت إن اسمها أم جرجس وإن مينا معاهم وطلبت 120 ألف جنيه فدية. لكن رجال الأمن اكتشفوا كمان مفاجأة صادمة..الصوت مش صوت ست أصلاً! كان راجل بيقلد صوت واحدة ست.

وفي الوقت ده بلاغ مرعب وصل للشرطة في الزاوية الحمراء.أهالي المنطقة لقوا ساقين بشريين مرميين جوه ترعة الإسماعيلية! والمنظر كان صادم لدرجة إن الناس فضلت تصرخ من الرعب.

الشرطة انتشلت الساقين والطب الشرعي أكد إنهم لشاب صغير وتم تقطيعهم بمنشار كهربائي!

ومع تمشيط المنطقة اتلقى ذراع بشري في صندوق زبالة قريب ولما أبو مينا وعمه شافوا الذراع عرفوه فورًا من الوشم اللي عليه.ساعتها الأب وقع منهار وهو بيصرخ: كنت هدفع أي فلوس بس ليه قتلتوه؟!

التحريات بدأت تكشف الكارثة الحقيقية.. كاميرا المراقبة جابت مينا وهو واقف مستني حد في الشارع. بعدها ظهر شخص اخد مينا ودخل بيه في شارع جانبي وضيق ومفيهوش أي كاميرات مراقبة

ومن هنا بدأ خيط الجريمة يتكشف.صاحب محل أدوات كهربائية قال للشرطة إن ممرض ساكن قريب اشترى منشار كهربائي من أيام قليلة..الاسم كان مصطفى ممرض بيشتغل في التمريض المنزلي. الشرطة داهمت الشقة ولقوا آثار دم وحبال وماسورة حديد. وبعد القبض على مصطفى وصاحبه إبراهيم اعترفوا بكل حاجة.

الحقيقة كانت أبشع من أي توقع..الاتنين كانوا عاملين إعلان شغل وهمي علشان يستدرجوا ضحايا ويطلبوا فدية من أهاليهم.ولما مينا وصل الشقة ضربوه على راسه وربطوه.وبعدها استخدموا تليفونه وبعتوا الرسائل لأهله علشان يطمنوهم. لكن مينا فضل يصرخ ويحاول يهرب
فقرروا يضربوه مرة تانيةوالضربة دي كانت النهاية

ولما اكتشفوا إنه مات..قرروا يقطعوا جثمانه بمنشار كهربائي ويرموا الأشلاء في أماكن مختلفة وكأنهم بيرموا قمامة! الأصعب إنهم بعد كل اللي عملوه كانوا نازلين في الشارع حاملين أجزاء من جثة مينا وسط الناس بمنتهى البرود وكأن مفيش روح إنسان راحت بإيديهم.
#القصه #رقي