User school

فاكرين البطاريات القديمة بتاعة تليفونات نوكيا اللي كنا بنشيلها بسهولة ونشحنها على شاحن ديسك توب ولو باظت او اتنفخت نغيرها بسهولة؟ اللي كل الاجهزة الجديدة خلت البطاريات جزء من التليفون ولو باظت خلاص كدة قول على التليفون كله يا رحمن يا رحيم؟ وهنتغرم كتير عشان تصلحها؟

اهو الاتحاد الأوروبي طلع قاتون مخصوص عشان يرجع لنا بطاريات التليفون بالشكل القديم ده

القانون اتوافق عليه من ٢٠٢٣ وهيبتدي تطبيقه من فبراير ٢٠٢٧.

الفكرة ببساطة إن بعد حوالي عشر شهور من دلوقتي أي جهاز جديد هيتباع جوه الاتحاد الأوروبي لازم يكون فيه بطارية يقدر المستخدم العادي يشيلها ويغيرها بنفسه من غير ما يحتاج يروح لمركز صيانة أو يستخدم أدوات معقدة.

القانون ده معمول علشان يقلل النفايات الإلكترونية ويخلي الأجهزة تعيش فترة أطول بدل ما ترمي الموبايل كله عشان البطارية ضعفت، وكمان علشان يوفر فلوس على الناس بدل ما يدفعوا في صيانة غالية أو يشتروا جهاز جديد.

كمان بيلزم الشركات إنها تصمم الأجهزة بطريقة تسمح بفك وتركيب البطارية بسهولة ومن غير لزق قوي أو تعقيد متعمد زي اللي كان بيحصل في موبايلات كتير في السنين اللي فاتت.

النقطة المهمة إن القرار ده بيشمل كل الشركات الكبيرة حتى أبل اللي معروفة إن أجهزتها مقفولة ومش سهل تتفتح، لكن بالفعل بدأت تعدل تصميماتها علشان تلتزم بالقانون الجديد، وده ممكن يغير شكل الآيفون في المستقبل ويخليه أسهل في الصيانة.

باختصار اللي بيحصل إن أوروبا بتحاول تفرض على شركات التكنولوجيا إنها تبقى أوضح وأسهل في الاستخدام والتصليح، وده ممكن مع الوقت يأثر على شكل الأجهزة في العالم كله مش بس في أوروبا، لأن الشركات غالبا مش هتصمم نسخ مختلفة لكل سوق فهتعمم نفس الفكرة على كل منتجاتها.

السماسرة اللي عندنا في الدول النامية حيستبدلوا البطاريات الأصلية بالتقليدية ويبيعوها بشكل منفرد. الاتحاد الاوروبي الفترة اللي فاتت ألزم أبل انها تغير شاحن الايفون الى يو إس بي تايب سي وغيرته فعلت لنفس السبب. اهو المفروض دول غنيه وبتدور ازاي توفر علي مواطنيها باستغلال وسع سوقهم، وانت كسوق كبير زيهم او اكبر قولي فكرة واحدة فكرت تفرضها توفر على مواطنيك.

هي ميزة وعيب عشان في ناس معندهاش ضمير ممكن تاخد البطارية الأصلية وتبدلها بالبديلة، لكن الميزة ان اقدر اعمل كده من غير ما اخسر الموبايل، ده شيء حلو جدا. عقبال ما يعملولنا شاشة تليفون زي نوكيا القديمة لو وقعت من الدور العاشر ميجرالهاش حاجة.

التحدي الكبير اللي هيواجه صناع الموبايلات هو ازاي يحافظوا على مقاومة المياه زي آي بي ٦٧ او آي بي ٦٨ مع بطاريات قابلة للإزالة في نفس الوقت.

ايه رأيكم في حاجة زي دي وهل هتفرق بجد معانا ولا الشركات هتتحايل عشان تغلي قطع الغيار وجودة المنتج نفسه؟

مواصفات iPhone 18 Pro Max بحسب أحدث التسريبات.⚠️

🤩