Yasso

الإنسان بيشوف الناس بعين طبعه…
مش بعين الحقيقة.

يعني إيه؟
يعني كل واحد فينا لابس نضارة من تجاربه، خبراته، مخاوفه، ونواياه…
وبيفسّر اللي قدّامه على الأساس ده.

فاللي متعود ينافق
يشك في الصادق،
ويستغرب الوضوح،
ويفتكر إن كل كلمة وراها مصلحة.
لأنه عمره ما اتكلم بصدق.

و اللي اتوجع كتير
يشوف أي صمت خيانة،
وأي تأخير إهمال،
وأي اختلاف تهديد.
حتى لو اللي قدّامه بريء… فهو مش شايفه، هو شايف وجعه القديم.

واللي عاش طول عمره مضغوط
يفتكر الهدوء ضعف،
واللطف سذاجة،
والحدود قسوة.
لأن عالمه الداخلي ما عرفش غير الضغط.

واللي جواه غضب مكبوت
يشوف أي ملاحظة هجوم،
وأي نصيحة إهانة،
وأي نقاش حرب.
هو مش سامعك… هو سامع صراعه الداخلي.

وفي المقابل…

اللي عنده سلام داخلي
يشوف الاعذار قبل الاتهام،
ويشوف النية قبل الغلطة،
ويشوف الإنسان قبل السلوك.

عشان كده…
ناس كتير هتحكم عليك ظلم و هتحطك في دور الشرير،
مش لأنك غلطان،
لكن لأنك اتشفت بعين نواياهم و مخاوفهم مش بعين الحقيقة .

ف لو سألت نفسك :
“ليه الناس فهمتني غلط؟”
افتكر إن
مش كل عين بتشوف الحقيقة…
في عين بتشوف اللي متعوداه،
وفي عين بتشوف اللي خايفه منه.

وخليك فاكر دايمًا:
رأيهم عنك…
مرآة ليهم،
مش حكم عليك. 🤍

د. نادر عطالله

●
إحنا مش بناخد موقف من حد اختلفنا معاه أو لمجرد خلاف أو عشان اتضايقنا بتصرف واحد حصل منه ؛ ولا بنشيل ونراكم حاجة فوق حاجة ؛ بالعكس إحنا بنتبع سياسة ' البلع . . آه والله بنبلع الزلط خصوصاً مع الناس اللي أكلنا معاهم عيش وملح ؛ لكن بتيجي اللحظة اللي بنشوف ونسمع ونقرا فيها الإهانة والإساءة في حقنا وحق السنين ؛ وقتها من هول المفاجأة بنتسمر في مكانا اللي هو ' إيه ده معقول ؟! ' معقول الإهانات دي موجهة لينا ؛ هل إحنا كنا متشافين كده فعلا ؛ إحنا بنغادر بعد الإساءة . . مش بعد الزعل . لأن فرق كبير بين الزعل والإساءة
فرق كبير بين إنك واخد على خاطرك وإنه اتكسر بخاطرك
في فرق بإنك بتبقى مستني الحد المعين الفلاني يصالح ويراضي ؛
وفرق إنك أكتشفت إن التراضي والإعتذار ده شئ تقيل جداً على قلب نفس الحد ؛
وللأسف تكبر النفس بيهمش مكانة المحبين وبيقلل من رصيد بقاءهم في حياة بعض
تاني وتالت ورابع في فرق بين إن تكون زعلت وبين إنك تكون بالفعل اتهانت
لأن الزعلان عشمان
لكن الشاعر بالإساءة كل سبل الإعتذار في حقه عمرها ما هتمحي اللي حسه ولا اللي عاشه لحظتها ولا هترجعه زي ماكان 🖤,, ✍

ܓ°●حبܓ°●

"أبشع إحساس ممكن تعيشه هو إنك 'تهون'.. تهون بعد كل اللي قدمته، وتهون وقت ما كنت محتاج طبطبة فلقيت قسوة. أصعب وجع هو اللي بيجي من الناس اللي كنت فاكرهم أمانك، فتكتشف إنك كنت بتبني في رمل. الزعل بيعرفنا مقامنا الحقيقي، وبيورينا مين اللي "أصيل" بيصون وقت الغضب، ومين اللي كان بيمثل الحنية ولما اتكشف رماك بأصعب كلام. اللي يحبك بجد، زعلك يغليه ويخاف يكسر بخاطرك، مش يسيبك ليلك طويل ووجعك ملوش آخر. المحبة أفعال بتبان في الخصام، أما الكلام فكل الناس بتقوله. 💔👌"
​



ّم

الراجل اللي يقرر يبقى خصم لمراته، ده خسران من أول لحظة. اللي يطفّي ضحكتها ويكسر قلبها، عمره ما هيبقى ليه بيت ولا أمان. البيت مش ساحة حرب، والست مش عدو لازم يتغلب عليه. كل كلمة جارحة وكل صرخة بتسيب أثر، وكل مرة يهينها بيزرع كره وسكوت مليان وجع.

اللي يوجع أم عياله بعصبيته، ما يستناش يشوف عياله طالعين متوازنين ولا بيته واقف على رجليه. الأم لو وقعت، الكل بيقع معاها. واللي فاكر إن الرجولة صوت عالي وضرب وقسوة، ده واهم… الرجولة في الحنية، في الكلمة الحلوة، في الاحترام.

البيت محتاج قلب رحيم مش عضلات، محتاج حضن مش أوامر. الراجل اللي يكسّر مراته، بيهدّ نفسه بإيده. واللي يهين أم عياله، بيكتب نهايته بإيده. الرجولة مش قسوة… الرجولة أمان وسند.