New ROEYA Academy for Business & Life Development

- عوض ربنا دايمًا مبهر.. بس مش تحكلنا يا دكتور قصة كده حصلت مع حد فعلًا؟
= حاضر، هقولك.. كان ليا واحد صاحبي عزيز جدًا عليا، بس عنده مشكلة كبيرة، أي حاجة تضيع عنده يتهم على طول الخدامة اللي عندهم، ست اسمها "أم سيد".
يعني ساعة مش لاقيها → أم سيد خدتها.
نضارة مش لاقيها → برضه أم سيد.
وفي الآخر يلاقي الحاجة في مكان تاني.
- يعني هو كان عايش يظلمها على الفاضي؟؟؟؟
= أيوه بالظبط.. لحد ما في يوم كان شاري 18 جنيه دهب وعايز يكملهم 20، مخبيهم في الدولاب. رجع البيت يدور عليهم ملقاهمش. على طول مسك أم سيد وقالها "هاتي الفلوس"، وجاب قريب له ضابط من القسم وبهدلوها، حتى حبسوها يوم كامل، ومع إنها فضلت تقول "أنا ما أخدتش حاجة"، محدش صدقها. وفي الآخر طردوها هي وجوزها البواب من العمارة، وسابوا الشغل ورجعوا بلدهم الفيوم بفضيحة.
- يا خبر! وبعدين؟
= بعد 10 سنين تقريبًا، وهو في بيت والدته بيفتش في مكتب قديم، لقى الـ18 جنيه الدهب جوه درج كان ناسيه! تخيلي.. ظلم الست دي سنين، وفي الآخر يطلع هو اللي حاطط الفلوس ونسي. جالي يومها بيقول: "أنا مش قادر أعيش بذنبها، قوليلي أعمل إيه؟". قولتله: تروح لها بلدها وتديها نصهم.
- عمل كده؟
= أيوه، راح الفيوم وسأل لحد ما وصل بيتها. لقاهم عايشين كويس، بيت واسع وفيه جنينة. دخل عليهم وقال لها: "أنا جاي أعتذرلك، وأبوس راس جوزك، واللي تطلبيه هعملهولك". وقالها كمان: "نص الفلوس دول ليكي". ردت عليه وقالت: "أنا مش هاخد حاجة، هاخد بس الفاكهة اللي جايبها معاك". استغرب وقالها: "ليه؟"
- ردت قالت إيه؟
= قالتله: "بُص.. بعد ما سيبنا العمارة عندك ورجعنا بلدنا، جوزي جاتله فرصة شغل في الخليج، سافر واشتغل كام سنة وجمع قرشين، عملنا مزرعة فراخ، المزرعة كبرت وبقت اتنين، وبعدها تلاتة، واشترينا أرض وبنينا عمارتين. والرسول ﷺ جالي في المنام وقال لي: هيجيلك يعتذرلك.. اقبلي اعتذاره، وما تاخديش منه عوض.. عوضك عند ربنا"