Mans Reviews

مراجعة فيلم (The Crow) بدون حرق 🎞

فيلم (The Crow) هو فيلم قديم إصدار سنة 1994 وتصنيفه Action/Fantasy من بطولة Brandon Lee إبن الأسطورة Bruce Lee.

قصة الفيلم عن شخص إسمه Eric (Brandon) وخطيبته بيتقتلوا في الشارع قبل فرحهم بطريقة دموية من عصابة عنيفة ، وبعد موتهم بسنة Eric بيرجع للحياة بطريقة غامضة بمساعدة غراب وبيبدأ يدلوا على المجرمين اللي عملوا فيه كده هو وخطيبته عشان ينتقم منهم.

الفيلم بغض النظر عن قصته اللي تبان غريبة وضعيفة بس حرفيا فيلم قوي جدا ومظلم ودم* وي بشكل مش طبيعي وتستمتع وإنت بتتفرج عليه جدا.

الفيلم واخد 7.5/10 على IMDb وواخد 86% على Rotten Tomatoes وطبعا دي أرقام كبيرة جدا وأنا رأيي الشخصي إنه يستحق المشاهدة بشدة.

معلومة عالماشي: Brandon Lee إت*قت*ل في الفيلم بجد بض*رب نار عن طريق الخطأ وإضطروا يستخدموا digital effects عشان يكملوا تصوير المشاهد المتبقية.

معلومة تانية: الفيلم من كتر ما نجح إتعمله re-make كذا مرة بأبطال تانيين ولكن كلهم فشلوا ولكن في واحد منتظر هينزل يوم 23/8 بطولة Bill Skarsgard بتاع سلسلة IT، الفيلم طبعا بيتهاجم من قبل ما ينزل بس قدرات Bill في التمثيل ممكن تخلي الفيلم في حتة تانية ولكن في كل الأحوال مفيش نسخة هتوصل لعظمة ال masterpiece الأصلية بتاعة 1994.

مراجعة فيلم (Fractured) بدون حرق 🎞

لو بتحبوا الأفلام اللي مليانة غموض وتبقى قاعد على أعصابك وعايز تفهم اللي هيحصل وبعدين تتصدم في الأخر يبقى الفيلم ده ليك 👇🏽

فيلم (Fractured) فيلم إصدار سنة ٢٠١٩ بطولة Sam Worthington ممثل سلسلة Avatar وتصنيفه Mystery (إثارة وغموض).

الفيلم بيحكي عن زوجين وبنتهم رايحين يقضوا أجازة عند قرايبهم وبيحصل حادثة وإيد البنت بتتكسر وبيجروا بيها على أقرب مستشفى والأم بتدخل الكشف مع بنتها، ولكنهم بيختفوا بعدها من المستشفى وتبتدي رحلة الأب إنه يلاقيهم.

الفيلم مش جديد بس ممتع ومشوق جدا وأداء Sam هايل وال Plot Twist عظيم.

الفيلم واخد 6.5/10 على IMDb و 57% على Rotten Tomatoes وأنا أديله 7/10 وأنصح بيه 👌🏼

إزاي تعرف تقييم الفيلم اللي عايز تتفرج عليه وتعرف رأي الناس فيه ؟ وتثق في أي موقع تقييم أفلام أكتر ؟
في البوست ده هقولكوا مقارنة بين أشهر موقعين لتقييم الأفلام والفرق بينهم ومين أفضل بإختصار قدر الإمكان.

نبدأ ب IMDb وهو إختصار ل Internet Movie Database و هو إسم على مسمى هو قاعدة بيانات عملاقة للأفلام والمسلسلات والممثلين وتفاصيل كل عمل فني.
بإختصار شديد التقييم هنا من ١٠ وطبعا في معادلات معينة لحساب الأصوات وأي شخص عادي ممكن يعمل أكونت ويخش يقيم أي عمل فني وعشان كده هو تقييم بيدي فكرة عن رأي الجمهور والمشاهد العادي بدون الدخول في تفاصيل وأراء تقنية وفنية بحتة.

الموقع التاني هو Rotten Tomatoes أو الطماطم الفاسدة التقييم فيه مهم وليه وزن تقيل لأن اللي بيقيم خبراء ونقاد فنيين مش مشاهدين عاديين بيعرفوا تفاصيل عالم السينما وكلامهم وتقييمهم للفيلم بيخليك ترجع تركز وتشوف حجات إنت مخدتش بالك منها وإنت بتتفرج. والتقييم هنا يا Rotten يعني فاسد ده لو الفيلم أقل من ٦٠% و Fresh لو أعلى من ٦٠% وفي Certified Fresh ودي ليها شروط معينة تقدروا تشوفوها عالموقع.

كل واحد في الموقعين ليه مميزات وليه عيوب ممكن نكلم عليها بالتفصيل أكتر بعد كده، ولكن كرأي شخصي أنا بميل أكتر ل IMDb، ونصيحة مني جميع التقييمات عامة هي مش مرجع أساسي لمستوى المنتج وإنما هي بتديك نظرة عامة فقط وتثير فضولك إيجابيا أو سلبيا عشان تتفرج وتحكم بنفسك وخليكوا فاكرين "لولا إختلاف الأذواق لبارت السلع".

مراجعة فيلم (Atlas) بدون حرق 🎞

فيلم (Atlas) هو أخر أعمال Jennifer Lopez وبطولة Mark Strong الغني عن التعريف و Simu Liu بطل فيلم Shang-Chi نزل يوم ٢٤/٥ ومتوفر للمشاهدة على Netflix.

الفيلم نوعه خيال علمي (Sci-fi) وأكشن بيتكلم بشكل عام عن التطور بتاع الذكاء الإصطناعي (AI) وتأثيره على البشرية.

قصة الفيلم عبارة عن أطلس وهي محللة بيانات بتشتغل مع الحكومة وبتكره الذكاء الإصطناعي جدا وبتكره التعامل بيه ولكنها بتتحط في موقف إنها لازم تواجه روبوت خطير طور من نفسه ومن برمجته وبقى بيهدد الكوكب كله وهي الوحيدة اللي تقدر توقفه.

التصوير والجرافيكس في الفيلم جميلة جدا ومشاهد الأكشن والإنفجارات مبهرة، السكريبت بالنسبالي ضعيف والحوارات ما بين الشخصيات نادرا ما كانت ملفتة. أداء Jennifer مبالغ فيه أوي ومش مريح إنما في شخصية كانت جميلة بالنسبالي وهي شخصية سميث. الفيلم بشكل عام قايم على Plot Twist معين بس مش مقنع أوي أو مبرر للأحداث بالنسبالي.

الزبدة: الفيلم مش بشع بس مش واو، مرئيا مبهر لكن قصة ضعيفة وتقييمي الشخصي ليه ٥ من ١٠.

#أطلس

"الحياة قصيرة، حاول قدر الإمكان أن تتجنب إهدار ساعتين منها في فيلم لن تستمتع به." (روجر إيبرت)

المراجعة الفيلمية هي الكتابة عن فيلم جديد أو قديم بغرض تعريف المشاهد بمضمون الفيلم، نظرة عامة على الأحداث، الممثلين المشاركين وما إذا كان الفيلم يستحق المشاهدة أم لا وهي أقل أكاديمية وجدية من الدراسات السينيمائية النقدية.

للتنويه كمان المراجعة دايما رأي للمراجع وهو غير موضوعي ولا حيادي وده مفيد لأن الناس تحب معرفة آراء غيرها في المواد التي تستهلكها مثل الأفلام.

أتمنى المراجعات تكون مفيدة بالنسبالكم وتديكوا الخلاصة المطلوبة وأكون ضيف خفيف إن شاء الله 🙏🏼