Cooking by Reham

عصر ما قبل الصوصات أيام ما كان للأكل هيبة وطعم حقيقي🍲❤️
مين فاكر صينية الألومنيوم الكبيرة دي لما كانت تتفرش في وسط اللمة؟
أيام ما كنا بناكل ونشبع بجد، ولا كان فيه "صوص كذا" ولا "دريسنج كذا
كانت هي "التشة" بتاعة الملوخية اللي بتجيب لآخر الشارع
وصلصة البامية المتسبكة صح اللي تفتح النفس
الرز بالشعرية المفلفل
والفرخة المحمرة المقرمشة
وطبعاً ملك السفرة: الباذنجان المخلل بالدقة والتوم والفلفل الحامي اللي يضبط الدماغ 🌶️🍆
الأكل ده مش مجرد وصفات، ده كان حب متدوب في الحِلل، ولمة عيلة مابتتعوضش. سيبكم من الأطباق المهرججة والصوصات الجديدة
في الآخر مفيش أحن ولا أطعم من أكل زمان وأيام زمان! ✨
#ذكريات

💟وصفة المسقعة المشوية الخفيفة بدون زيت 🍆🍆
من غير قلي ✨✨
تكفي 3 أشخاص و 300 سعر بس للطبق
المكونات 👇
- 2 بتنجان رومي كبير مقطع شرايح
- 1 فلفل رومي + 1 فلفل حار اختياري
- 3 طماطم معصورة + معلقة صلصة
- 4 فص توم مفروم - شيليه لو قولونك تعبان
- معلقة صغيرة كمون + كزبرة ناشفة + ملح + فلفل
- رشة قرفة سر الطعم
- نص كوب مياه

الطريقة
1.شوي البتنجان رصي شرايح البتنجان في صينية تيفال/ورق زبدة. رشي ملح خفيف وسيبيه 10 دقايق ينزل ميته. بعدين دخليه الفرن أو الجريل 15 دقيقة كل وش 7 دقايق لحد ما ياخد لون من غير زيت خالص.
2. الصلصة في حلة حطي التوم + كمون + كزبرة 30 ثانية، انزلي بالطماطم والصلصة والمياه. سيبيها تتسبك 10 دقايق.
3. الرص في طاجن رصي طبقة بتنجان، طبقة فلفل، طبقة صلصة. كرري لحد ما تخلص الكمية.
4. الفرن غطيها بفويل ودخليها 20 دقيقة. شيلي الفويل آخر 5 دقايق عشان الوش يحمر.

أيام بعد العيد واللحمة كتير والمعدة بتصرخ "ارحمونا" 😂

سلطه المكرونه بالزبادي🥒 باردة ومنعشة ترد الروح


المقادير 👇
- مكرونة فيونكة مسلوقة ومبردة أو أي نوع تحبيه
علبة زبادي + 2 معلقة مايونيز
- ذرة حلوة + خيار مكعبات + زيتون شرايح
- عصرة ليمون + ملح + فلفل + نعناع ناشف
- رشة سماق في الآخر

الطريقة👇
1. المكرونة تتسلق وتتغسل بمياه ساقعة
2. قلبي الزبادي + المايونيز + الليمون = الصوص
3. اخلطي كله ودخليه التلاجة ساعة
4. صفر نار، صفر لحوم، 100% راحة
إنتو كمان زهقتوا من اللحمة؟
ولا لسه في العيد مود؟ 👇