Shehab Compu World

لو فاكر إن أسعار الرامات وصلت لأعلى نقطة... فالتقارير الجديدة بتقول إن اللي جاي أصعب بكتير 💀

🟥 خلال الفترة الأخيرة شفنا رجوع رامات DDR2 للحياة من تاني، وشركات ترجع تقدم رامات 4GB من جديد، ومايكروسوفت نفسها رجعت تقول إن 8GB بقت كفاية للاستخدام اليومي بعد ما كانت بتقول إن الحد الادني الجديد هو 16GB.

🟦 لكن واضح إن الأخبار دي كانت مجرد تمهيد للي جاي... وإحنا مكنّاش واخدين بالنا.

🟦 عشان للأسف في تقارير جديدة بتقول إن أسعار الرامات هتزيد بنسبة من 40% لـ 50% خلال الربع الثالث من 2026، وبعدها زيادة تانية من 30% إلى 40% في الربع الأخير من السنة.

🟦 والأسوأ إن التقارير دي بتقول إن الأسعار هتفضل تزيد طول 2027، ومفيش انفراجة حقيقية متوقعة قبل 2028.

🟦 والسبب الرئيسي إن شركات تصنيع الذواكر بقت تخصص جزء كبير من إنتاجها لشركات الذكاء الاصطناعي ومراكز البيانات، وده خلّى الكميات المتاحة لأجهزة الكمبيوتر واللاب توب والموبايلات أقل من الأول.

🟦 وده معناه إن أي جهاز جديد، أو ترقية رام، أو حتى منتجات كتير بتعتمد على الذواكر، ممكن تستمر أسعارها في الزيادة خلال الفترة الجاية.

🟨 الخلاصة
كل الأخبار اللي شفناها في الأسابيع الأخيرة بدأت تركب على بعض...
عودة رامات DDR2 القديمة، عودة رامات 4GB للواجهة، بعد ما كانت أقل سعة متعارف عليها في الـ DDR4 هي 8GB، وتراجع مايكروسوفت عن كلامها بخصوص إن 8GB لا تصلح للأستخدام اليومي... ودلوقتي تقرير بيتوقع موجة زيادات جديدة توصل لـ50%.

واضح إن أزمة الرامات مبقتش أزمة مؤقتة، وإن تأثير طفرة الذكاء الاصطناعي هيستمر معانا لحد 2028 على الأقل... والسؤال هنا: هل فعلًا هنرجع نشوف أسعار الرامات الطبيعية تاني؟ ولا ده بقى الواقع الجديد؟ 🤔
------------
|
| | | | | |

هو مش 8GB كانت مبقتش تنفع؟... ولا الكلام اتغير لما الأجهزة الجديدة بتاعتكم نزلت بـ8GB؟ 👀

🟥 فاكر لما قالولك 8GB RAM مبقتش تكفي؟... مايكروسوفت دلوقتي رجعت تقول إنها كفاية تاني!

🟦 خلال الفترات الأخيرة، مايكروسوفت كانت من أكتر الشركات اللي بتتكلم عن إن مستقبل Windows 11 وإن الذكاء الاصطناعي محتاج أجهزة قوية، وإن 16GB بقت تقريبًا الحد الأدني الطبيعي لأي جهاز جديد.

🟦 وناس كتير فعلًا بدأت تعتبر إن 8GB خلاص بقت من الماضي، خصوصًا مع استهلاك Windows 11 والبرامج الحديثة.

🟦 لكن فجأة... الشركة غيرت كلامها.

🟦 ومع إطلاق Surface Laptop الجديد من Microsoft، واللي بيتوفر بنسخة 8GB RAM، كان لازم مايكروسوفت تبرر وجود النسخة دي، فرجعت تقول إن 8GB كافية للاستخدامات اليومية، زي التصفح، مشاهدة الفيديوهات، الدراسة، وبرامج الشغل العادية.

🟦 أما لو عاوز تشغل برامج تقيلة، أو تفتح برامج كتير مع بعض، أو تستخدم مميزات Copilot+ والذكاء الاصطناعي على الجهاز، فهنا بنقول إن 16GB أو أكتر هو الاختيار المناسب.

🟦 الغريب إن الكلام ده جه بعد أيام قليلة من أخبار بتأكد إن سوق الرامات بقى يمر بواحدة من أصعب فتراته، زي ارتفاع الأسعار ونقص المخزون بشكل ملحوظ.

🟦 وده خلّى شركات كتير تراجع حساباتها، سواء بإرجاع سعات قديمة للسوق أو بتقديم أجهزة بذاكرة أقل، عشان تقدر تحافظ على أسعارها وتفضل منافسة.

🟨 الخلاصة
من كام يوم شفنا رامات DDR2 ظهرت من جديد، وبعدها شفنا شركة رجعت تقدم رامات بسعة 4GB بعد ما كانت السعة دي انقرضت.
والنهارده مايكروسوفت رجعت تقول إن 8GB كفاية للاستخدام اليومي.
فا واضح إن أزمة الرامات بقت بتغيّر كلام و قرارات الشركات...
والسؤال هنا: هل فعلًا 8GB بقت كفاية؟ ولا دي مجرد محاولة للتأقلم مع ارتفاع أسعار الرامات؟ 🤔
-----------
|
| | | | | | |