CiVil Bot

حمزة محسن:

في البوست ده هتكلم عن قسم ري في نقاط منفصلة وفي اخر نقطتين هتكلم عن المواد والمشاريع.
- اسم القسم بالعربي: "قسم الري والمنشئات الهيدروليكية" مش "ري وصرف" وبالمناسبة الصرف تبع صحية في اشغال ري ما اخدتوا في الصحية مش تبعنا 😃
- متخليش غلاسة المواد اللي اتدرستبك من القسم او غلاسة الاشخاص اللي درسولك يكرهوك فيه، في رابعة الظروف مختلفة والعدد قليل "حوالي ٢٠" والمواد مختلفة تماما وبتتدرس في ظروف مختلفة جدا وبتفهم احسن وحرفياً بتتصاحب عالدكاترة والمعيدين.
- الشغل : عايز اقولكم بس اني مخلص من يومين والنهاردة قدامي فرصة شغل بس لولا الجيش كنت قدمت 😃 ، مجالنا نادر ووظايفه قليله بس برضه مهندسين الري قليلين. في خرسانة فيه ٢٠٠ وظيفة وفيه ٦٠٠ واحد بينافسوا عليها عندنا وظيفتين وفيه ٣ بينافسوا عليها ، قوللي انت مين احسن 😃
- الترم الاول عندنا اسهل ما يكون بتروح ٣ ايام في الاسبوع بتقعد اول شهر متسلمش شيتات وتمتحن مادتين في الميد تيرم و فيه ٥ مواد منتهية تقدر تجيب فيهم امتياز بسهولة، الترم التاني غشيم شوية عشان مواد انشاءات.
- كترتيب في السهولة : اشغال ، ري ، انشاءات ، اه احنا مش اسهل قسم للاسف.
مواد الترم الأول :
سدود : مادة نصها نظري ونصها مسألتين slope stability زي اخر شابتر في السويل.
موانيء: بتتكلم عن المواني وتصميم بعض اجزائها ( نص نظري ونص مسائل)
هيدرولوجي: زي الهيدرولوجي اللي اخدتوها في اول الري بتاع تانية
جوفية أو موارد مائية : اختياري وسهلين جدا
شبكات : شبه الصحية شوية بس مفيش تصميم محطات
أعمال ري : امتداد لري تالتة
كلها مواد ميه وكلها سهلة وخصوصا اول ٤ بتجيب فيهم امتياز بسهولة
الشبكات تقيلة شوية واعمال الري مكملة الترم التاني.
مواد الترم التاني باختصار
خرسانة / استيل / فاونديشن / اعمال ري / ساحلية / سكة حديد أو صحية / تقارير فنية
المشاريع : فيه مشاريع كتير بس بيصفصقوا على مشروعين في الاخر :
١- هيدرولوجي : مشروعي الجميل 😃
مشروع قوي جدا و كويس جدا وفق نفس الوقت سهل بس مش جداً 😃
الناس اللي ماسكاه كويسة ومحترمة.
بتستخدم قريب من ١٠ برامج بتتعلمهم في المشروع ما عدا الاوتوكاد لازم تتعلمه قبل ما تدخل.
٢- مواني : بتدخله لو انت مريح وعايز تخلص او عندك شغل تاني غير هندسة او كده.
مشروع سهل جدا بس الاستفادة منه قليلة.
المشروعين الامتياز مضمون فيهم جدا مهما عملت فمتقلقش من النقطة دي.

م/ماجد عبدالله *صحية*

مادة الهندسة الصحية ( 2 ) - مادة من مواد التيرم الاول فى رابعة اشغال
هتدرس اية ؟
هتعرف ازاى تنقى المية وتخليها صالحة لمياه الشرب
هتعرف ازاى تعالج مية الصرف الصحى وتخليها مثلا صالحة للزراعة أو صالحة انها تتصرف على مصرف بدون ضرر عالبيئة
هتنقى المية ازاى ؟
ببساطة زى ماقولنا فى تالتة نبذة كدة
هناخد المية نرميها فى تانك فترة زمنية عشان المواد العالقة اللى فيها تترسب
وبعدين هاخدها افلترها من خلال طبقة رمل ( المرشح )
وبعدين هعقم المية واحطلها كلور عشان تبقى صالحة للشرب ومافيهاش كائنات حية مضرة
وبالتالى اللى هتدرسة فى تنقية المية هو
1 - Sedimentation بالتفصيل
2 - Filtration بالتفصيل
3 - Disinfection بالتفصيل
الجميل بقة السنة دى انتوا اتنفختوا تنقيه مياه شرب فى تالتة مدنى وخدتوا تقريبا 70% من عمليات التنقيه بالتفصيل ويبقى ناقص بس كيفية التصميم...والاجمل بقة ان جزء المياه هو الألطف والأسهل من جزء الصرف يعنى تقدر تعتبر انك مخلص تنقية مياه شرب من دلوقتى وتحط فبطنك بطيخة صيفي وبقة معاك نص المنهج فجيبك من وانت لسة اجازة دلوقتى (لما تاخد التصميم)
الصرف ...
هنجمع مياه الصرف الصحى ( ازاى ....... زى مادرسنا فى تالتة - الشبكات - ودى خلاص كدة )
نعالج بقة
هدخل جوة محطة الصرف
عندى مراحل معينة من المعالجة لازم امشي عليها بالترتيب
اول مرحلة وهى المعالجة الابتدائية ودى بشيل من مية الصرف التراب والمواد العالقة الكبيرة والاكياس وورق الشجر وما الى ذلك (معالجة طبيعيه مفيهاش اى تفاعلات)
تانى مرحلة اسمها المعالجة الثانوية او المعالجة البيولوجية ودى هنستخدم فيها البكتريا الموجودة فى المية بحيث نهئ لها ظروف معينه تعرف تشتغل فيها وتكسر المواد العضوية الموجودة فى المية اللى بتسبب ضرر للبيئة
تالت مرحلة اسمها المعالجة الثلاثية ودى غالبا مش هتدرسوها او هتدرسوا جزء بسيط منها وهى اازاى نشيل المعادن والاملاح الثقيلة من المية زى الفوسفات والنيتروجين
يعنى فى الصرف هندرس
1 - Primary Treatment
2 - Secondary ( Biological ) Treatment
للعلم : الصحية بتاعت رابعة اسهل بكتير من صحية تالتة مدنى ... ومش هيبقى نفس كمية اللى كنتوا بتزاكروا منها ...
واحدة واحدة كل يوم كدة (اثناء الدراسة - على جروب اشغال) ممكن انزلكم بوست فيه شرح شبه تفصيلي عن كل عمليه من عمليات المعالجة والتنقية مع شوية صور وفيديوهات ان امكن....بس اثناء الدراسة

السلام عليكم اولا
انا اخوكم عمر عاصم رابعة اشغال وكنت عاوز اكلمكم شوية عن مشروع الصحية بما انى انا مندوب المشروع ده
احب بس تعرفوا عنى انى طالع من تالتة بمقبول ومعايا سويل يعنى بمثل عامة الشعب 😂
يا جماعة فعليا مش هتنضغط الضغط الى انت انضغطه فى تالتة تانى رابعة سنة لذيذة بس لو متابعتش فيها هتلبس فى وجهة نظرى الترم الاول اتقل من الترم التانى
اشغال تتلخص فى 3 مواد الى هما ( مساحة وفاونديشن و GIS ) و GIS ده عبارة عن برنامج المفروض انك بتتعلمه نظرى بقية المواد تتلم والخرسانة والاستيل اخف من تالتة ومعاملة الناس معاك فى رابعة مختلفة عن تالتة كتير قوى وهتحس بكده
بالنسبة للمشروع :
المشروع بتدخله على حسب تقديرك انا كنت جايب 800 درجة وكنت رقم 97 على المشروع واحنا تقريبا كنا 108
السنادى الى كان نازل بيشرح المشروع دكتور محمد حسن من احسن الدكاترة المحترمة الى ممكن تقابلها ومتعاون جدا مع الطلبة وبيحب يتعامل مع طالب واحد مش كذا واحد يكلمه . احنا طلبنا منه زيارة لمحطة ماية و محطة صرف ورحناهم فى اخر السنة حاولوا انتوا تروحوها قبل الترم التانى هتفرق معاكم جدا لما تبقى بتشتغل على حاجة وانت شايفها بعينك
المشروع السنادى منقسم عندنا ل 5 اجزاء
1) شبكات ماية
2) شبكات صرف
ودول يعتبروا شغل الترم الاول وهتخش عليهم مناقشة فى بداية الترم التانى عليها 50 درجة
3) محطة معالجة مايه
4) محطة معالجة صرف
ودول شغل الترم التانى
واتضاف جزء جديد على المشروع اسمه
5) ادارة المخلفات الصلبة (solid waste managment)
المناقشة النهائية عليها 100 درجة 80 على الماية والصرف وحوالى 20 على solid
يبقى كده فاضل 50 درجة اعمال سنة على شغلك الى بتسلمه طول الترم
البرامج الى هتحتاجها بالاولوية
1) autocad
2) office excell & ward
3) water gems & sewar gems
المشروع ده هتستفاد منه وهتلاقى الى تساله والمعيديين متعاونيين جدا ومحدش هيقولك لا لما تساله
غالبا دكاترة الصحية عندنا فى الكلية عددهم 10 او اكتر فبتتقسموا 5 جروبات بالابجدية وكل جروب بيتابع عليه دكتوريين
بالمناسبة اشغال 5 مشاريع والاعداد تقريبا كده
1) صحية فى حدود 110
2) طرق 60
3) سكة فى حدود 55
4) نقل ومرور فى حدود 10
5) مساحة فى حدود 10
محدش يقلق من تالتة بتجيب فيها اكتر ما انت متوقع وربنا يوفقكم ويوفقنا جميعا