Fresh&pure

من اول ما بدأنا شغل وفى طلبة لسه بيدرسوا بيجوا يشتغلوا معانا ...
عايزين نقولهم ان عمرهم ما كانوا مجرد أسماءً عابرة،
ولا ورديات بتخلص وتمشي،
كانوا سيرة بتتكتب بالتعب،
وحكايات ليها تمن…
طلبة لسه في عز الدراسة،
شايلين كتبهم على أكتافهم،
وشايلين معاها قلق الغد وثقل الحلم.
كان في ألف سبب يخليهم يأجلوا،
وألف حجة تقول لسه بدري،
لكنهم اختاروا البداية وهم في منتصف الطريق،
اختاروا المواجهة بدل الانتظار.
في وقت الإجازات لما ناس كتير بتدور على مهرب من الضغط
هما شافوها ساحة جديدة للكفاح يكملوا فيها المشوار
ناس بتنام من غير ما تظبط منبه ولا فارق معاها وقت وهما بينزلوا مع أول ضوء،
أجساد مُنهكة، وإرادة واقفة على رجليها.
يخرجوا من محاضرة لشيفت ومن شفت لمواصلة ومن مواصلة لامتحان ومن امتحان لكورس ومن كورس لشغل
وكأن التعب لا يملك حق الاعتراض
ولا إذن الكلام.
جمعوا بين مذاكرة بتُرهق،
ومسئوليات لاترحم
وحلم عنيد لا يعرف الانكسار.

الكلام ده بنكتبه كشهادة فخر بيكم
وجودكم معانا ما كانش مجرد شغل،
كان قيمة مضافة ورسالة امل
وإحنا يمكن ما كنّاش أعلى صوت في حياتكم،
ولا أكبر محطة ولا قدرنا نخقق ليكم كل اللى بتحلموا بيه بسبب امكانياتنا البسيطة لكن شاهدين على تعبكم اللى شايلنه من غير شكوى،
وعلى حلم عاش رغم القسوة،
وعلى ناس تستاهل
كل حاجة حلوة جاية
حتى لو الطريق ليها كان مرهق ومتعب

ربنا يجبر بخاطركم جبر الكرام،
ويكافئ صبركم
ويفتح لكم الخير من اوسع ابوابه
احنا فخورين بيكم وبنحبكم وفخورين انكم جزء من المكان دا ❤️