Marwa nasr

*إزاي التفريغ الانفعالي للمشاعر ممكن يكون الحل النهاءى لجميع احساسك السلبى بالتدنى
وفقد قيمتك الحقيقيه
وازاى تفريغ المشاعر
ممكن يعالج المريض نهائيا ؟
خلينا نتكلم عن مثال زى
( نموذج لن أعيش في جلباب )*

تخيل معظمنا كبشر عندنا كم هائل من المشاعر جوانا و مش بنطلعها أبدا.. و يمكن المشاعر دي تكون لأقرب الناس ليك سواء مشاعر حزن أو كره أو غضب إلخ.. و لكن خلونا النهاردة نركز على كبت المشاعر الخاصة بإساءات الطفولة.. سبحان الله معرفش ايه اللي بيخلي المخ يكون حساس قوي تجاه أي شيء متعلق بالأب و الأم.. يمكن عشان الغريزة أو يمكن التعلق بيهم كونهم أول ناس رحبوا بيك في الحياة.. مش عارف و لكن لو الشخص اتعرض لإهمال في طفولته أو تلبيه لاحتياجاته من الحب و الحنان بيطلع هش و ضعيف و تايه زي شخصية عبد الوهاب في لن أعيش في جلباب ابي.

عبد الوهاب طول المسلسل عايز يوصل رسالة لابوه بطريقة غير مباشرة إنه قد ايه جامد و يقدر يعتمد على نفسه.. بس هي عشان رسالة مشفرة فطبيعي أبوه مش هيفهمها بل و يمكن عبد الوهاب ذات نفسه مش واخد باله ان هو ده الدافع اللي بيحركه طول الوقت.. عبد الوهاب على مستوى اللاوعي جرب كل الطرق عشان يوصل الرسالة.. اتجوز واحدة أجنبية مش شبه عائلته خالص و راح في كذا وظيفة و انضم لجماعات إسلامية.. المهم إنه في النهاية لقى نفسه تايه.. لأن في سؤال جواه مالوش اجابه ( هو أنا عبارة عن ايه ما دام ابويا مش بيحبني ؟ )

الغريبة كمان إن أبوه (عبد الغفور) كان بيحاول يوصله رسالة مشفرة من تحت لتحت كده إنه عايز ابنه يبقى احسن منه لأنه عنده عقدة من محفوظ ابن المعلم سردينه أنه كان ببلبس بدلة في الوكالة و متعلم و كان بيعامل عبد الغفور بمنتهى الذل.. فهو نفسه عبد الوهاب يحقق الحلم العبثي اللي عبد الغفور حلم بيه في أول المسلسل إنه يبقى معلم كبير و متعلم و يلبس بدلة.. ده كله طبعاً على المستوى اللاوعي.. و لذلك هما الاتنين قعدوا طول المسلسل يعاندوا في بعض بالرسائل المشفرة و محدش فاهم التاني.. و بناءً عليه كان عبد الوهاب بيحس بالنقص اكتر و الهشاشة النفسية و عبد الغفور بيحس بالذنب لانه معرفش يربي ابنه كويس و دائما قلقان من المستقبل .

لحد ما يجي مشهد *الMaster scene* في المسلسل و هو التفريغ الانفعالي لمشاعر الابن و الاب كذلك.. مشهد صادق و مكتوب بحرفية شديدة.. الابن فجأة بعد موجة شديدة من التوهان بيتكلم مع أبوه بصراحة و بيعيط و بيقوله إن مشكلته كلها هو أنه مدالوش حنان الأب.. هو اداله الفلوس و البرستيج بين الناس.. لكنه نسى أهم حاجة و هو الحب.. الحب الحقيقي مش الحب المشروط.. و كذلك الاب اعترف لابنه أنه بيحبه جداً و عايزه يبقى احسن منه.. بس يمكن عقدة أنه كان فقير جداً و هو صغير خليته بيعامل ابنه بقسوة عشان مش عايزه يبقى زيه.. تخيلوا كم المشاعر الهائلة اللي كان محشورة جواهم و نفسها تطلع عشان يحصل مكاشفة منطقية بين الطرفين و يفهموا بعض بجد.. و لكن يفهموا اهم حاجة و هو أنهم الاتنين بيحبوا بعض و لكن عشان مفيش حوار صريح بينهم فدائما في سوء تفاهم .

و بعد المشهد ده حصل تحول في شخصية عبد الوهاب و عبد الغفور *Character arc* .. عبد الوهاب بقى واثق من نفسه و عبد الغفور مبقاش قلقان و العقدة اللي عنده اتعالجت.. لو أنت مشفتش حالات نفسية في الواقع عندها نفس المشكلة فأنت مش هتصدق التحول الجذري اللي حصل للشخصيات.. و لكن صدقوني كتير من الحالات بعد تفريغ مشاعرها المكبوتة تجاه الأشخاص بيتعالجوا نهائيا.. و لكن اظن في رسالة أهم و هي إن مترحموش ولادكم يا جماعة من المشاعر.. متحلوش مشكلة واحدة و تنسوا بقية المشكلات.. الحب العائلي هو اجمل حب لأنه غير مشروط.. حب لمجرد الحب .