Design Shop

ليه دايما اكل الحجة والدتك احلي من اكل مراتك؟! (السبب العلمي الحقيقي)

تنويه: هذا البوست متحيز للامهات.

تخيل معايا انك ف مطعم بتاكل ومستمتع فجاة تلاقي البوليس جه وبيطلع حمير من مخزن المطعم! حتة اللحمة اللي نصها جوا بوقك طعمها هيبقي ازاي؟
بالطبع الطعم هيتغير رغم انك كنت لسة بتاكل ومبسوط ومخلص نص كيلو لوحدك لحد دلوقتي لكن نفس اللحمة دي بعد معرفة انها لحمة حمير مخك وقف الاشارات اللي جاية من بوقك مستمتعة بالاكل واصدر قرار متحيز بانها خلاص لحمة وحشة بناءا علي معتقداتك مش بناءا علي معلومة حقيقة ان اللحمة طعمها حلو فعلا وبالتالي القطمة التانية بيبقي طعمها وحش (دا لو انت كملت اكل يعني)

يبقي احنا متفقين دلوقتي انه المخ ممكن يلغي واقع حقيقي ويصدر حكم تاني غير حقيقي بس مبني علي معتقداته.

فلو انت ف مخك معتقد ان اكل مامتك احلي مهما مراتك هتطبخ مخك هيعمل اكس كبيرة عالاشارات الحقيقية اللي جاية تقول ان اكل مراتك احلي ويطلع الاستنتاج اللي ماشي مع معتقداته

الشركات طبعا مينفعش تسيب معلومة زي دي!

طعم التفاحة اللي عليها لزقة اوريجينال يبقي طعمها احلي من التفاحة الاوريجينال اللي من غير لزقة القهوة اللي ف كوباية استاربكس بتبقي احلي من كوباية عادية
عشان كدا مهم اوي انت كمان تستغل دا وتلعب مع المخ عشان تزود مبيعاتك فتهتم بشكل الاكياس بتاعتك والعلب اللي بتروح للعملا والتغليف لمنتجاتك لانه هياثر ف رايهم بالايجاب او السلب.

ممكن تحس انه الموضوع سطحي وهو مجرد وهم ظاهري لكن ف تجربة اتعملت سنة 2008 جابوا متطوعين شربوهم نفس البيرة واحدة من ازازة غالية بسعر غالي والتانية من ازازة اي كلام بسعر رخيص لقوا انه مراكز الرضا والاستمتاع ف المخ بقت نشطة لما الازازة كانت غالية ولم تنشط لما اتقدمت من ازازة رخيصة فالموضوع فعلا حقيقي من جوا اعصاب مخك مش مجرد وهم.

فلو عايز تزود مبيعاتك اهتم بالتغليف والاكياس اهتم بالصور اهتم بالصفحة بتاعتك علي فيسبوك لو عايز تخلي الناس تحترمك اكتر اهتم بمظهرك الشخصي لو عايزة تخلي جوزك يحب اكلك اكتر من اكل مامته ف سوري مش هقولك البوست دا متخيز للامهات!

Text author : Dr abdelhady