Psy Yasmeen Rabea

صحتك النفسية أساس توازنك وقوتك كل يوم 🤍💙

خطوات بسيطة زي الرياضة، الأكل الصحي، التعبير عن مشاعرك، وقضاء وقت مع اللي بتحبيهم… ممكن تفرق جدًا في يومك وحالتك ✨

ولو حسيتي إنك محتاجة دعم… متتردديش،
أطباء الصحة النفسية في خدمتك من خلال الخط الساخن 16328 أو 105

أو عبر المنصة الإلكترونية للصحة النفسية
https://mentalhealth.mohp.gov.eg/mental/web/ar

تؤكد الأمانة العامة للصحة النفسية وعلاج الإدمان التزامها الكامل بتقديم كافة خدمات الدعم والاستشارات النفسية للمواطنين، وذلك في إطار حرصها على تعزيز الصحة النفسية وتحقيق الاستجابة السريعة للاحتياجات المجتمعية.

وتقدم هذه الخدمات من خلال الخط الساخن للاستشارات النفسية، الذي يعمل على مدار الساعة لتقديم الدعم الفوري والمتخصص، بالإضافة إلى المنصة الوطنية للاستشارات النفسية التي تتيح خدمات الإرشاد النفسي بسهولة ويسر وبأعلى درجات السرية والمهنية.

وتدعو الأمانة العامة جميع المواطنين إلى الاستفادة من هذه الخدمات، تأكيدا على أهمية الصحة النفسية كجزء لا يتجزأ من الصحة العامة.

ولو حسيت إنك محتاج دعم… متترددش،
أطباء الصحة النفسية في خدمتك من خلال الخط الساخن 16328 أو 105

أو عبر المنصة الإلكترونية للصحة النفسية
https://mentalhealth.mohp.gov.eg/mental/web/ar

العقبات مهمة
السلمة المكسورة بتخليك تطلع سلمتين بخطوة واحدة 😉

{وَمَا تَوْفِيقِي إِلَّا بِاللَّهِ}
كل كلمة مكتوبة هنا وراها
شجاعة ومحاولة حقيقية للتغيير
بعض من تجارب لرحلة علاجية
أسأل الله أن يكتب فيها النفع والطمأنينة 🌱
ممتنة جدًا للثقة وللسماح إني أكون جزء من الرحلة❤️

سعيدة جدا بمشاركتي في تدريب Mindful Parentin
اللى أضاف لي أدوات عملية مهمة في العمل مع الأطفال والمراهقين وأسرهم
تجربة ثرية على المستوى المهني والشخصي وممتنة لكل القائمين على التدريب والتنظيم ❤️

Found this on Pinterest

التفكير الاجتراري… لما دماغك تعيد نفس الفكرة ألف مرة

أوقات بنقع في دائرة مرهقة اسمها التفكير الاجتراري:
إنك تفضّلي تفكّري في نفس الموقف، نفس الكلمة، نفس الغلطة…
وتعيدي وتزيدي وكإن دماغك معلّقة على مشهد واحد.

المشكلة إن الاجترار مش بيحلّ حاجة…
بالعكس:
يزوّد القلق
يزوّد الإحساس بالذنب
ويخلّيكي تحسين إن الموقف أكبر من حجمه.

ليه بنعمل كده؟
لأن عقلنا بيحاول يلاقي إجابة أو يطمن نفسه…
بس بدل ما يطمن، يفضل يلفّ في حلقة مفرغة.

علامات إنك في الاجترار:
• بتفكّري طول الوقت في "ليه حصل؟"
• لوم ذاتي مستمر
• صعوبة في النوم
• تركيزك ضعيف
• دماغك شغّالة حتى وإنتي مشغولة

إزاي نكسر الحلقة؟
🌿 اسألي نفسك: “الفكرة دي مفيدة ولا مضيّعاني؟”
🌿 اكتبي اللي بيدور في دماغك، الكتابة بتوقف الزنّ الداخلي.
🌿 حددي وقت للتفكير (10 دقايق في اليوم)، وبعدها اقفلي الباب.
🌿 ارجعي لجسمك: تنفس، مشي، حركة بسيطة.
🌿 بدّلي السؤال من “ليه؟” إلى “أعمل إيه دلوقتي؟”

فاكري:
إعادة التفكير مش معناها إنك هتوصلي لحل…
السكون الحقيقي بييجي لما تخرجي من دماغك وترجعي للحظة اللي إنتي فيها.

"مش كل فكرة تستحق إنك تقعدي معاها…
وفي أفكار لازم تقفلي عليها الباب وتمشي." 🌿

✨ حِيَل نفسية بسيطة… هتظبّط لكِ يومك من غير ما تاخدي بالك ✨

أوقات كتير بنبقى محتاجين حاجة صغيرة تفك الزنقة وتحسّسنا إن الدنيا لسه ماشية…
حاجات بسيطة، بس بتفرق جدًا في المزاج والطاقة.

💛 1) قاعدة الـ 5 دقايق

لو في حاجة مأجّلاها وبتكبّري الموضوع…
قولي: "هعملها 5 دقايق بس".
وهتتفاجئي إنك كمّلتِ من غير ما تحسي.

💛 2) ركن الهُدوء

اعملي لنفسك كرسي أو ركن صغير في البيت…
أول ما تقعدي عليه: مفيش تفكير، مفيش لوم، بس نفس عميق ودقيقتين هدوء.

💛 3) اسألي نفسك: "أنا محتاجة إيه دلوقتي؟"

قبل ما تعيّطي أو تتعصّبي…
اسألي السؤال ده.
هتلاقي الإجابة بسيطة:
مَيّة؟ راحة؟ حضن؟ هوَاء؟ نور أقل؟
ولما تحددي الاحتياج… المشاعر تهدى تلقائي.

💛 4) حوّلي القلق لحركة

بدل ما الأفكار تلفّ…
اكتبي، لوني، امشي شوية في البيت.
الجسم لما يتحرك… المخ بيهَدى.

💛 5) 3 حاجات تفُكّ الضغط

لما تحسي مخنوقة… اعملي:

حاجة للجسم: مَيّة أو ستريتش بسيط.

حاجة للعقل: خطوة واحدة في حاجة متعطلة.

حاجة للمشاعر: كلمة حلوة لنفسك أو رسالة لحد بتحبيه.

💛 6) وقفة الـ 3 ثواني قبل الرد

وقّفي 3 ثواني بس قبل ما تردّي.
الثواني دي بتنقذ مواقف وعلاقات كتير.

💛 7) عادة صغيرة أحسن من خطة كبيرة

بدل ما تقولي "هتغيّر من بكرة"،
ابدئي بحاجة صغيرة جدًا… زي كوباية مَيّة أول ما تصحي.
العادة الصغيرة بتفتح الباب لباقي التغيير.

🌿 وأهم حاجة…

إنك تفكّري نفسك:
انتي تستاهلي الراحة… وتستاهلي تهتمي بنفسك… ومش لازم تغيّري الدنيا كلها عشان تحسي بتحسّن.
خطوات صغيرة… بس بتعمل فرق كبير ❤️✨

محاولة إصلاح الأهل… الدائرة اللي بتجرّح ومبتتعالجش

في ناس بتقضي سنين من عمرها بتحاول تصلّح أهلها…
تحاول تفهمهم، تراضيهم، تبرّر، أو تكون “كويسة كفاية” علشان ياخدوا منهم الحب اللي مفتقدينه من زمان.

ويفضل جواهم الصوت القديم:
"لو كنت أهدى… لو ما كنتش بزعلهم… لو كنت أحسن، كانوا هيحبوني."

بس الحقيقة إن في نوع من الأهل مش هيتغيّر.
مش لأنك مش كفاية…
لكن لأنهم هما نفسهم مش مستعدين يواجهوا ألمهم أو يشوفوا غلطاتهم.

النضج الحقيقي؟
إنك تفهم إن إصلاحهم مش دورك.
وإنك مش مسؤولة إنك تشيلي جروحهم القديمة.
والحب اللي ماخدتهوش زمان مش هتلاقيه لما تفضلي تدوري عليه عند نفس الناس اللي وجّعوك.

التعافي مش معناه تقطعي علاقتك بيهم…
لكن إنك تفكي التعلّق الداخلي بيهم.
إنك تبطّلي تنتظري منهم حاجة هما مش قادرين يدوها.

ابدئي تدي لنفسك إنتي:
الاهتمام… الاحترام… الأمان…
الحاجات اللي كنتي محتاجاها زمان ولسه محتاجاها دلوقتي.

لما تسيبي محاولة إصلاحهم…
هتكتشفي إن الراحة كانت جوّاك،
ومستنيا بس إنك تختاري نفسك. 🌿

مستشفى المعمورة