Coach Reham

فكرة إننا نقلل من تمارين البطن للبنت ، دي مش مظبوطة
اه التمرين لوحده مش هيخسس الكرش من غير دايت
بس ده مش معناه إن تمارين البطن مالهاش لازمة
هي فعلاً أقل أهمية من الدايت في موضوع التخسيس
لكن ليها أدوار تانية محدش ينفع يهملها 👌

تمارين البطن بتقوي العضلات الداخلية اللي ماسكة منطقة الوسط
العضلات دي لو ضعيفة بيبان البطن مترهل حتى لو مافيهوش دهون
يعني البنت ممكن وزنها قليل وبطنها طالعة بسبب العضلات الضعيفة
وهنا التمرين هو الحل مش الدايت

كمان تمارين البطن بتثبت شكل الوسط
يعني بتديكي خصر أشيك
وبتساعدك إن وقفتك تكون مظبوطة
وطريقة المشي نفسها بتتغير لما العضلة دي تبقى قوية

غير كده إن عضلات البطن لما تقوى بتحمي الظهر
كتير من البنات ضهرها بيوجعها بسبب ضعف الكور
وأول ما يقوّوا المنطقة دي الوجع بيبدأ يختفي

وبردو في حاجة مهمة
لما تبقي بتتمرني مقاومة
قوة البطن بتفرق معاكي في كل تمرين
بتشيل حمل التمرين صح
متتعوريش
ومتضغطيش على العمود الفقري

يعني تمارين البطن مش رفاهية
ولا حاجة كمالية
هي جزء من إن جسمك يبقى قوي ومشدود ومتناسق
بس لازم تبقي فاهمة دورها الحقيقي
هي مش اللي هتشيّل دهون البطن
لكن هي اللي هتمنع الترهل وتظبط شكل الوسط وتحسّن الأداء

فمتقلليش منها
اعمليها يومين أو تلاتة في الأسبوع
مش محتاجة أكتر من كده
لو محتاجه تمارين البطن المناسبه لحالتك اكتبيلي تعليق بتتمرني في الجيم والا في البيت وانا هرد عليكي بموضوع مناسب فيه التمارين بالصور 📥🫰

الانضباط البدني هو اختبار لانضباطك العقلي 🧠💪🏻