ORV

WILLEMSTAD – Dia 10 di yüli 2026, a tuma lugá e seremonia di entrega di sertifikado na dos klas di BAVPOL CAP Hercertificering 2024-1 i 2025-1.

Durante e seremonia, 16 empleado di Curaçao Airport Partners (CAP) a risibí nan resertifikashon komo Buitengewoon Agent van Politie (BAVPOL). E seremonia a konta ku presensia di Direktora di ORV, Sra. Alpha Falbru, COO di CAP, Sr. Michaël Hoehenberger, Sector Manager di ORV, Sr. Jowenny Troeman, i maestra di seremonia, Sra. Sulene Girigoria.

Na petishon di CAP, ORV a desaroyá i ehekutá e programa akí ku e meta pa garantisá ku e empleadonan di CAP ta sigui disponé di e konosementu, abilidatnan i kompetensianan aktual ku ta nesesario pa ehersé nan funshon di BAVPOL na un manera profeshonal, efektivo i responsabel.

Durante e seremonia, tambe a duna rekonosementu na e graduadonan ku a resaltá akademikamente: Sr. Francis Melfor, Sr. Selfrin Sambo, Sra. Darlen La Bast, i Sr. Jendell Martis, ku e promedio mas haltu di 9.2.

ORV ta gradisí CAP pa e konfiansa depositá den nos pa ehekutá e trayekto di hercertificering akí, i ta deseá tur graduadonan hopi éksito den ehekushon di nan funshon. Nos ta konfia ku nan lo sigui representá Curaçao Airport Partners ku integridat, profeshonalismo i dedikashon.

Aktualmente ORV tin 13 klas di aspirante i studiantenan ku ta sigui nan trayekto di formashon serka nos.

Den e post aki bo por haña un bista di tur e 13 formashonnan ku ta den proseso aktualmente.

Pa sèptèmber, i òktober 2026 nos lo kuminsá ku algun formashonnan nobo ku ta inklui:
- Basis Politie Opleiding (BPO) 2026-1.
- Basis Beroepsopleiding Beveiliger (BBB) 2026-1,
- i tambe e formashonnan di Voortgezette Politiemedewerker voor Senior Politiemedewerker (VPO) 2026-2 i 2026-3.

ORV ta deseá tur nos aspirante i studiantenan hopi éksito den nan trayekto di formashon.