FBD Elbasan

Fakulteti i Biznesit dhe i Drejtësisë në Universitetin e Elbasanit “Aleksandër Xhuvani” përmbylli me sukses punimet e Konferencës së 13-të Shkencore Ndërkombëtare. Nën temën “Rritja e Qëndrueshme, Inovacioni Digjital dhe Dinamika e Tregut: Ura mes Biznesit dhe Ligjit”, ky aktivitet bëri bashkë mbi 110 autorë nga Shqipëria, rajoni dhe vende si Britania e Madhe, Bullgaria e Turqia, të cilët prezantuan gjetjet e tyre në 70 punime shkencore.

Rektorja e Universitetit, Prof. Dr. Elvira Fetahu, e vlerësoi këtë konferencë si një traditë 13-vjeçare që bashkon biznesin me ligjin për të adresuar sfidat e transformimit digjital, ndërsa theksoi se institucioni po konsolidon ndërkombëtarizimin përmes programeve në anglisht dhe kërkimit shkencor cilësor. Një vëmendje të veçantë mori sesioni special i Ric Eitalbania mbi inovacionin në sektorin e mineraleve, duke e konfirmuar këtë platformë si një urë lidhëse jetike mes kërkimit akademik dhe zhvillimit të qëndrueshëm.